തിരുവനന്തപുരം: ശ്രീകാര്യത്ത് ആര്‍.എസ്.എസ് പ്രവര്‍ത്തകന്‍ രാജേഷിനെ കൊലപ്പെടുത്തിയ കേസിലെ പത്ത് പ്രതികളെ ഓഗസ്റ്റ് എട്ടുവരെ കസ്റ്റഡിയില്‍ വിട്ടു.
ഒന്നാം പ്രതി മണിക്കുട്ടന്‍, രണ്ടാം പ്രതി വിജിത്ത്, മൂന്നാം പ്രതി പ്രമോദ്, നാലാം പ്രതി എബി, അഞ്ചാം പ്രതി വിപിന്‍, ആറാം പ്രതി സിബി, ഏഴാം പ്രതി ബിജു എന്ന ഷൈജു, എട്ടാം പ്രതി അരുണ്‍, പത്താം പ്രതി മോനി, പതിനൊന്നാം പ്രതി ബായി എന്നിവരെയാണ് അഞ്ച് ദിവസത്തെ പൊലിസ് കസ്റ്റഡിയില്‍ നല്‍കിയത്. ഏഴുദിവസം വേണമെന്ന പൊലിസിന്റെ ആവശ്യം കോടതി അംഗീകരിച്ചില്ല .
തിരുവനന്തപുരം ഒന്നാം ക്ലാസ് മജിസ്‌ട്രേറ്റ് കോടതിയാണ് കേസ് പരിഗണിക്കുന്നത്. കേസിലെ ഒന്‍പതാം പ്രതി സജു കുര്യന്റെ ഒരു ദിവസത്തെ കസ്റ്റഡി മാത്രമാണ് പൊലിസ് ആവശ്യപ്പെട്ടത്. ഈ ആവശ്യം കോടതി അംഗീകരിച്ചു. കേസിലെ പന്ത്രണ്ടാം പ്രതി വിഷ്ണു മോഹന് കോടതി ഉപാധികളോടെ ജാമ്യം നല്‍കി.
എന്നാല്‍, അഞ്ചാം പ്രതി വിപിന്റെ ജാമ്യ ഹരജി തള്ളി. ജാമ്യം ലഭിച്ച പന്ത്രണ്ടാം പ്രതി വിഷ്ണുവിനെ മരണപ്പെട്ട രാജേഷ് മര്‍ദിച്ചതിന്റെ പ്രതികാരാണ് കൊലപാതകത്തിലേക്ക് നയിച്ചതെന്ന് പ്രോസിക്യൂഷന്‍ വാദിച്ചെങ്കിലും കോടതി തള്ളുകയായിരുന്നു.
അതേസമയം, ബിനീഷ് കോടിയേരിയുടെ വീടിനും വാഹനത്തിനും നേരെ കല്ലെറിഞ്ഞെ കേസില്‍ അഞ്ച് ആര്‍.എസ്.എസ് പ്രവര്‍ത്തകരെ ഈ മാസം നാലുവരെ റിമാന്‍ഡ് ചെയ്തു. ഇവരുടെ ജാമ്യഹരജിയില്‍ വാദം പൂര്‍ത്തിയായി.