പാലക്കാട്: നഗരത്തില്‍ ശകുന്തള ജങ്ഷനു സമീപത്തുള്ള റെയില്‍വേയുടെ കാല്‍നടമേല്‍പ്പാല പരിസരം മദ്യപാനികളുടെയും സാമൂഹ്യ വിരുദ്ധരുടേയും താവളമാകുന്നു. ശകുന്തള ജങ്ഷന്‍ റെയില്‍വേ ഗേറ്റ് അടച്ചതോടെ ഇരുഭാഗവും അയടച്ചുകെട്ടിയ റെയില്‍വേ മേല്‍പാലത്തിനു സമീപമാണ് മദ്യപാനികളും സാമൂഹ്യവിരുദ്ധരും കൈയ്യടക്കിയിട്ടുള്ളത്.
പരസ്യമായുള്ള മലമൂത്ര വിസര്‍ജനം, മദ്യപാനം, പുകവലി എന്നിവയും, ഇരുട്ടിന്റെ മറവില്‍ പ്രകൃതി വിരുദ്ധപ്രവര്‍ത്തനങ്ങളും, അനാശാസ്യ പ്രവര്‍ത്തനങ്ങളും ഇവിടെ തകൃതിയാണ്. ഇതിനു പുറമെ കഞ്ചാവ്, നിരോധിത പുകയിലയുല്‍പന്നങ്ങള്‍ ആഘോഷദിവസങ്ങളില്‍ അനധികൃത മദ്യവില്‍പന എന്നിവയും സജീവമാണ്. റെയില്‍വേ ഗേറ്റ് അടച്ചതോടെ ഇതുവഴിയുള്ള വാഹനഗതാഗതം ഇല്ലാതായതും ഇവിടെ നിയമപാലകരുടെ സേവനം ഇല്ലാത്തതുമാണ് ഇത്തരക്കാര്‍ക്ക് സഹായകമായത്.
ഭൂരിഭാഗം കാല്‍നടയാത്രക്കാരും കാല്‍നടമേല്‍പ്പാലം കയറി ഇറങ്ങിവരുമ്പോള്‍ ചിലര്‍ റെയില്‍പാലം മുറിച്ചുകടന്നും അപ്പുറം എത്തുന്നുണ്ട്. റെയില്‍വേ മേല്‍പാലത്തില്‍ വിളക്കുകള്‍ ഉണ്ടെങ്കിലും ഇത് ഇടയ്ക്ക് പ്രവര്‍ത്തനരഹിതമാവുന്നതും ഇത്തരക്കാര്‍ക്ക് സഹായകമാകും. ഒരു വര്‍ഷം മുന്‍പ് മേട്ടുപാളയം തെരുവിലെ വ്യാപാരി ബാങ്കിലടയ്ക്കുന്നതിനായി പണവുമായി പോകുംവഴി ഇയാളെ അക്രമിച്ച് പണം തട്ടിയ സംഭവവും നടന്നിട്ടുണ്ട്.
കാല്‍നട മേല്‍പാലത്തിനു സമീപമുള്ള പ്രദേശം പൂര്‍ണമായും റെയില്‍വേയുടെ ഉടമസ്ഥതയിലുള്ളതാണ്. ഏക്കറുകണക്കിനു വരുന്ന പ്രദേശം പൂര്‍ണമായും കാടുപിടിച്ചു കിടക്കുന്നതിനാലാണ് ഇവിടെ എന്തു നടന്നാലും അറിയാന്‍ പറ്റാത്ത സ്ഥിതിയായിട്ടുള്ളത്. സമീപത്തുള്ള വ്യാപാരസ്ഥാപനങ്ങള്‍ അടയ്ക്കുന്നതോടെ പ്രദേശം വിജനമാകുന്നുതും ഇവിടെ എന്തും നടക്കുമെന്ന സ്ഥിതിയാണ്.
സമീപത്തെ വ്യാപാര സ്ഥാപനങ്ങളില്‍നിന്നും വരുന്ന സ്ത്രീകളടക്കമുള്ള യയാത്രക്കാര്‍ പ്രാണഭയത്തോടെയാണ് കാല്‍നടമേല്‍പാലം കയറി ഇറങ്ങുന്നത്. മേല്‍പാലം കയറി ഇറങ്ങുന്നതിനുള്ള പ്രയാസം ഒഴിവാക്കാനായി നിര്‍മിക്കാന്‍ ഉദ്ദേശിച്ച എസ്‌കലേറ്ററും, റാമ്പും കടലാസില്‍ ഒതുങ്ങിയിരിക്കുകയാണ്. രാപകലന്യേ ആയിരക്കണക്കിന് സ്ത്രീകളും വിദ്യാര്‍ഥികളുമടക്കം യാത്രക്കാര്‍ വന്നുപോകുന്ന ശകുന്തള ജങ്ഷന് പരിസരം സാമൂഹ്യവിരൂദ്ധരുടേയും മദ്യപാനികളുടേയും താവളമായി മമാറിയിട്ടും പലരും കണ്ടില്ലെന്ന് നടിക്കുകയാണ് അധികൃതര്‍.