മണ്ണാര്‍ക്കാട്: കളഞ്ഞുകിട്ടിയ സ്വര്‍ണ മോതിരം തിരിച്ചുകൊടുത്ത് വിദ്യാര്‍ഥി മാതൃകയായി. കല്ലാംകുഴി നിഷാദ് നസീമ ദമ്പതികളുടെ മകനും നാലാം ക്ലാസ് വിദ്യാര്‍ഥിയുമായ മുഹമ്മദ് സ്വാലിഹാണ് കളഞ്ഞുകിട്ടിയ മോതിരം തിരികേ ഏല്‍പ്പിച്ച് വിദ്യാര്‍ഥികള്‍ക്കിടയില്‍ താരമായായത്. കാഞ്ഞിരപ്പുഴ മുതുകുറുശ്ശി കെ.വി.എ.എല്‍.പി സ്‌കൂളിലെ അന്‍ഷിദ എന്ന കുട്ടിയുടെ സ്വര്‍ണ മോതിരം സ്‌കൂളില്‍ വെച്ച് കാണാതാവുകയായിരുന്നു. മുഹമ്മദ് സ്വാലിഹിനെ അസംബ്ലിയില്‍ വെച്ച് ഹെഡ്മാസ്റ്റര്‍ എ.ആര്‍ രവിശങ്കര്‍ മാസ്റ്റര്‍ അനുമോദിച്ചു. തുടര്‍ന്ന് ക്ലാസില്‍ വെച്ച് ക്ലാസ് ടീച്ചര്‍ വസന്തം രാജഗോപാല്‍ മുഹമ്മദ് സ്വാലിഹിന് ഉപഹാരം നല്‍കുകയും ചെയ്തു.