മലപ്പുറം: ചോദ്യപേപ്പറില്‍ വീണ്ടും പിഴവ്. ഇന്നലെ നടന്ന മലയാളം സെക്കന്‍ഡ് പരീക്ഷാ ചോദ്യപേപ്പറിലാണ് അബദ്ധം പിണഞ്ഞത്. കഴിഞ്ഞ ദിവസം ചോദ്യപേപ്പറിനൊപ്പം നല്‍കേണ്ട രേഖാചിത്രം മറന്നിരുന്നു.
ഇന്നലെ നടന്ന എട്ടാം ക്ലാസ് മലയാളം സെക്കന്‍ഡ് അടിസ്ഥാന പാഠാവലി എന്ന പേരിലാണു പഠിപ്പിക്കുന്നത്. ഈ പേരില്‍ ചോദ്യപേപ്പര്‍ തയാറാക്കുന്നതിനുപകരം കേരള പാഠാവലി എന്നാണ് എഴുതിയിരുന്നത്. ചോദ്യപേപ്പറിനുമുകളില്‍ വലിയ അക്ഷരത്തില്‍ കേരള പാഠാവലി എന്നെഴുതിയത് അധ്യാപകരെയും വിദ്യാര്‍ഥികളെയും തെല്ലുനേരം ആശങ്കയിലാക്കി.
പത്താം ക്ലാസ് സാമൂഹ്യശാസ്ത്രം പരീക്ഷയ്ക്കു ചോദ്യപേപ്പറിനൊപ്പം വിതരണം ചെയ്യേണ്ട ഭൂപടത്തിന്റെ രേഖചിത്രം നല്‍കാതിരുന്നത് 'സുപ്രഭാതം' റിപ്പോര്‍ട്ട് ചെയ്തിരുന്നു.