കരാക്കസ്: വെനസ്വലയില്‍ പബ്ലിക് പ്രോസിക്യൂട്ടറുടെ ഓഫിസ് സൈന്യം വളഞ്ഞു. തന്നെ ബന്ദിയാക്കിയെന്ന് ചീഫ് പ്രോസിക്യൂട്ടര്‍ ലുയ്‌സ ഒര്‍ടേഗ പറഞ്ഞു.
പുതിയ ലെജിസ്ലേറ്റീവ് ബോഡി രൂപീകരിച്ച് അടുത്ത ദിവസമാണ് ചീഫ് പ്രോസിക്യൂട്ടറെ സര്‍ക്കാര്‍ ബന്ദിയാക്കിയത്.
കഴിഞ്ഞ ദിവസം നടന്ന തെരഞ്ഞെടുപ്പില്‍ പ്രസിഡന്റ് നിക്കോളാസ് മദുറോ വിജയം അവകാശപ്പെട്ട് രംഗത്തെത്തിയിരുന്നു. ഇതിനു പിന്നാലെയാണ് 545 അംഗ ലെജിസ്ലേറ്റീവ് ബോഡി രൂപീകരിച്ചത്.
എന്നാല്‍ ഈ നടപടി നിയമ വിരുദ്ധമാണെന്ന് ചീഫ് പ്രോസിക്യൂട്ടര്‍ അറിയിച്ചിരുന്നു. ഇതിനു പിന്നാലെയാണ് സൈനിക നടപടി. തെരഞ്ഞെടുപ്പ് ഫലം വഞ്ചനയുടെ ബാക്കിപത്രമാണെന്നായിരുന്നു ഇവരുടെ പ്രതികരണം.
തന്നെ പബ്ലിക് പ്രോസിക്യൂട്ടര്‍ ആസ്ഥാന മന്ദിരത്തില്‍ തടവിലാക്കിയതിനെതിരേ ചീഫ് പ്രോസിക്യൂട്ടര്‍ രംഗത്തെത്തി. ദേശീയ, അന്താരാഷ്ട്ര സമൂഹം വിഷയത്തില്‍ ഇടപെടണമെന്നും അവര്‍ ട്വീറ്റ് ചെയ്തു.
കഴിഞ്ഞ ദിവസം പാര്‍ലമെന്റിനു മുന്നില്‍ പ്രതിഷേധിച്ചവര്‍ക്ക് നേരെ പൊലിസ് കണ്ണീര്‍വാതകം പ്രയോഗിച്ചിരുന്നു.