മംഗളൂരു: പൗരത്വ ഭേദഗതിയ്‌ക്കെതിരായ പ്രതിഷേധത്തിനിടെ മംഗളൂരുവില്‍ ഉണ്ടായ പൊലിസ് വെടിവയ്പ്പില്‍ ജുഡീഷ്യല്‍ അന്വേഷണം ഇല്ല. സംഭവം സി.ഐ.ഡി അന്വേഷിക്കുമെന്ന് കര്‍ണാടക മുഖ്യമന്ത്രി ബി.എസ് യെദ്യൂരപ്പ അറിയിച്ചു.

ഡിസംബര്‍ 19 നാണ് പ്രതിഷേധത്തിനിടെ രണ്ടു പേര്‍ പൊലിസ് വെടിവയ്പ്പില്‍ കൊല്ലപ്പെട്ടത്. മംഗളൂരു ബന്ദര്‍ സ്വദേശി നൗഷീര്‍ (24 ), കന്ദക്ക് സ്വദേശിയായ ജലീല്‍ (49) എന്നിവരാണ് മരിച്ചത്. റബര്‍ ബുള്ളറ്റ് ഉപയോഗിച്ച് പൊലിസ് നടത്തിയ വെടിവയ്പിലാണ് ഇവര്‍ മരിച്ചതെന്നാണ് ഔദ്യോഗിക വിശദീകരണം.

നിരോധനാജ്ഞ നിലനില്‍ക്കുന്നതിനിടെയാണ് ആയിരക്കണക്കിനാളുകള്‍ മംഗളൂരു നഗരത്തില്‍ പ്രതിഷേധിച്ചത്. ഇവര്‍ക്കുനേരെ കണ്ണീര്‍വാതകം പ്രയോഗിക്കുകയും തുടര്‍ന്നു വെടിവയ്പ് നടത്തുകയുമായിരുന്നെന്ന് ദൃക്‌സാക്ഷികള്‍ വ്യക്തമാക്കുന്നു.