പയ്യോളി: ദേശീയ പാതയിലെ സീബ്രാലൈനുകള്‍ മാഞ്ഞു. പയ്യോളി ടൗണിലെ തിരക്കേറിയ രണ്ടിടങ്ങളിലെ ലൈനുകളാണ് പൂര്‍ണമായും മാഞ്ഞു പോയത്. ഇതോടെ റോഡ് മുറിച്ചു കടക്കേണ്ടവരും വാഹന ഡ്രൈവര്‍മാരും ദുരിതത്തിലായി.
ബസ് സ്റ്റാന്‍ഡ് കവാടത്തിനരികെയും മുന്‍സിഫ് കോടതിക്ക് സമീപത്തുമുള്ള രണ്ട് സീബ്രാലൈനുകളാണ് മാഞ്ഞു പോയത്. വാഹന ഡ്രൈവര്‍മാരുടെ കാഴ്ചയില്‍പ്പെടാത്ത സീബ്രാലൈനിലൂടെ റോഡ് മുറിച്ചു കടക്കുന്ന കാല്‍നടയാത്രികര്‍ തലനാരിഴയ്ക്കാണ് പലപ്പോഴും അപകടത്തില്‍ നിന്ന് രക്ഷപ്പെടുന്നത്. ലൈന്‍ കാണാത്തത് കാരണം ലൈന്‍ ഇല്ലാത്ത ഭാഗത്ത് മുറിച്ചുകടക്കാന്‍ ശ്രമിക്കുന്നതു ഗതാഗത തടസത്തിനും അപകടത്തിനും കാരണമാകുന്നുണ്ട്.