കണ്ണൂര്‍: ഹരിതകേരളം മിഷന്റെ ആഭിമുഖ്യത്തില്‍ നടപ്പാക്കുന്ന മാലിന്യത്തില്‍ നിന്ന് സ്വാതന്ത്ര്യം ക്യാംപയിന്‍ ഇന്ന് ആരംഭിക്കും. ഗൃഹസന്ദര്‍ശനവും ശുചിത്വ സര്‍വേയുമാണ് നടക്കുക. കുടുംബശ്രീ പ്രവര്‍ത്തകര്‍, അങ്കണവാടി ടീച്ചര്‍മാര്‍, ആശാ വര്‍ക്കര്‍മാര്‍, സന്നദ്ധ പ്രവര്‍ത്തകര്‍, രാഷ്ട്രീയ സാമൂഹ്യ പ്രവര്‍ത്തകര്‍, വിരമിച്ച ജീവനക്കാര്‍ തുടങ്ങിയവരാണ് വളണ്ടിയര്‍മാരായി വീടുകള്‍ സന്ദര്‍ശിക്കുക. ഓരോ വീട്ടിലെയും മാലിന്യ സംസ്‌കരണ രീതി, ജൈവ-അജൈവ മാലിന്യങ്ങള്‍ വേര്‍തിരിക്കാറുണ്ടോ, മലിനജലം, പാഴ്‌വസ്തുക്കള്‍ എന്നിവ എങ്ങനെ കൈകാര്യം ചെയ്യുന്നു തുടങ്ങിയവ സംബന്ധിച്ച വിവരശേഖരണവും ബോധവത്കരണവുമാണ് ശുചിത്വ സര്‍വേയുടെ ലക്ഷ്യം.
ഈ മാസം 15നു നടക്കുന്ന മാലിന്യത്തില്‍ നിന്ന് സ്വാതന്ത്ര്യം പ്രഖ്യാപനത്തിന് മുന്നോടിയായി ആരംഭിക്കുന്ന ഗൃഹസന്ദര്‍ശന പരിപാടി 13വരെ നീളും. സ്വാതന്ത്ര്യ ദിനാഘോഷത്തിന്റെ ഭാഗമായി മന്ത്രിമാര്‍ ദേശീയ പതാക ഉയര്‍ത്തുന്ന ചടങ്ങിന് ശേഷമാണ് മാലിന്യത്തില്‍ നിന്ന് സ്വാതന്ത്ര്യം പ്രഖ്യാപനം നടത്തുക. പഞ്ചായത്ത്-വാര്‍ഡ് തലങ്ങളില്‍ ഓഗസ്റ്റ് 15ന് ശുചിത്വ സംഗമത്തില്‍ പ്രഖ്യാപനം നടത്തും. കേരളത്തെ സമ്പൂര്‍ണ മാലിന്യമുക്ത സംസ്ഥാനമാക്കുകയെന്ന മഹായജ്ഞത്തിന് തുടക്കമാകും. ഓരോ തദ്ദേശ സ്ഥാപനത്തിന് 20 ലക്ഷം രൂപ വീതം ശുചിത്വ മിഷന്‍ മുഖേന ലഭ്യമാക്കും. ഇതുമായി ബന്ധപ്പെട്ട പദ്ധതി നിര്‍ദേശം സെപ്റ്റംബര്‍ 15നു മുമ്പായി ഡി.പി.സി മുമ്പാകെ സമര്‍പ്പിക്കണം. യോഗത്തില്‍ പ്രസിഡന്റ് കെ.വി സുമേഷ്, കലക്ടര്‍ മീര്‍ മുഹമ്മദലി, മയര്‍ ഇ.പി ലത, ജില്ലാ പ്ലാനിങ് ഓഫിസര്‍ കെ. പ്രകാശന്‍, പഞ്ചായത്ത് ഡെപ്യൂട്ടി ഡയരക്ടര്‍ എന്‍.കെ അശോകന്‍, കെ.വി ഗോവിന്ദന്‍, അഭിജിത്ത് ടി.ജി സംസാരിച്ചു.