തിരുവമ്പാടി: ക്രിസ്മസിനെ വരവേല്‍ക്കാന്‍ മലയോരമേഖലയിലാകെ വര്‍ണ നക്ഷത്രങ്ങളൊരുക്കി വിശ്വാസികള്‍. വീടുകളിലും അങ്ങാടികളിലും നക്ഷത്രങ്ങള്‍ നിറഞ്ഞു. പേപ്പര്‍ നക്ഷത്രങ്ങളും എല്‍.ഇ.ഡി നക്ഷത്രങ്ങളുമാണു വിപണിയിലെ താരം. മലയോരങ്ങളിലെ മിക്ക അങ്ങാടികളിലും വിവിധതരം നക്ഷത്രങ്ങളുടെയും വര്‍ണ ബള്‍ബ് മാലകളുടെയും പുല്‍ക്കൂടുകളുടെയും ക്രിസ്മസ് ട്രീകളുടെയും പ്രത്യേക സ്റ്റാളുകളാണ് ഒരുക്കിയിട്ടുള്ളത്. കഴിഞ്ഞ വര്‍ഷത്തെക്കാള്‍ നക്ഷത്രങ്ങള്‍ക്കും അലങ്കാരങ്ങള്‍ക്കും വിലക്കുറവുണ്ടന്ന് വ്യാപാരികള്‍ പറയുന്നു.
പേപ്പര്‍ നക്ഷത്രങ്ങള്‍ക്ക് ആവശ്യക്കാര്‍ ഉണ്ടെങ്കിലും ഡിസൈനുകള്‍ കൂടുതലുള്ളത് എല്‍.ഇ.ഡി നക്ഷത്രങ്ങളിലാണ്. വിവിധ വര്‍ണങ്ങളില്‍ മിന്നിമറയുന്ന എല്‍.ഇ.ഡി നക്ഷത്രങ്ങള്‍ക്കാണ് ആവശ്യക്കാര്‍ കൂടുതല്‍. ചൂരലില്‍ തീര്‍ത്ത പുല്‍ക്കൂടുകളാണ് ഇത്തവണത്തെ പുതുമ. മാര്‍ബിളില്‍ തീര്‍ത്ത സെറ്റുകളും വിവിധ വര്‍ണങ്ങളിലുള്ള ചൈനീസ് അലങ്കാര ബള്‍ബുകളും ബള്‍ബ് മാലകളും ബെല്‍റ്റു മാലകളും വിപണിയില്‍ ഉണ്ട്.