പാവറട്ടി: മുല്ലശ്ശേരി പഞ്ചായത്തില്‍പ്പെട്ട കോള്‍ പടവുകളില്‍ ഉപയോഗിക്കുന്ന വാഹനങ്ങള്‍ക്ക് നികുതി നിര്‍ബന്ധമാക്കി ചാവക്കാട് ലോക് അദാലത്ത് ഉത്തരവിറക്കി.
അന്നകര കര്‍ഷകനായ ഷിബു നാലുപുരയ്ക്കല്‍ നല്‍കിയ പരാതിയുടെ അടിസ്ഥാനത്തില്‍ ലോക് അദാലത്ത് ചെയര്‍മാന്‍ കൂടിയായ ചാവക്കാട് സബ് ജഡജ് കെ.എന്‍ ഹരികുമാറാണ് ഉത്തരവിറക്കിയത്. 2017-18 കാലഘട്ടത്തില്‍ നെല്‍കൃഷിക്ക് പാടശേഖരങ്ങളില്‍ നിയമപ്രകാരം ടാക്‌സ് അടച്ച ടാക്ടറുകളും ടെയ്‌ലറുകളും മെഷനറികളും മാത്രമേ പണിക്ക് ഇറക്കാവൂ എന്ന് ഉത്തരവില്‍ വ്യക്തമാക്കിയിട്ടുണ്ട്. പരാതിയില്‍ ഗുരുവായൂര്‍ ആര്‍.ടി.ഒ എതിര്‍കക്ഷിയായിരുന്നു. ഉത്തരവിന്റെ പകര്‍പ്പ് മുല്ലശ്ശേരി പഞ്ചായത്തിലെ കോള്‍ പടവുകളുടെ സെക്രട്ടറിക്കോ പ്രസിഡന്റിനോ അയച്ച് കൊടുക്കേണ്ടതാണെന്ന് ആര്‍.ടി.ഒയ്ക്ക് ലോക് അദാലത്ത് നിര്‍ദേശം നല്‍കി.
ഹരജിക്കാരനു വേണ്ടി അഡ്വക്കേറ്റ് ജോജോ ജേക്കബ് .എന്‍ ഹാജരായി. കഴിഞ്ഞ കൊയ്ത്ത് സീസണില്‍ ടാക്‌സ് അടക്കാത്ത വാഹനങ്ങളാണ് പാടശേഖരങ്ങളില്‍ പണിക്ക് വ്യാപകമായി ഉപയോഗിക്കുന്നത് എന്ന് പത്രങ്ങള്‍ വാര്‍ത്ത നല്‍കിയിരുന്നു. ഇതിനെ തുടര്‍ന്നാണ് നാലുപുരക്കല്‍ ഷിബു ലോക് അദാലത്തിനെ സമീപിച്ചത്. അടുത്ത കൃഷി സീസണ്‍ തുടങ്ങാനിരിക്കെ ലോക് അദാലത്ത് ഇറക്കിയ ഈ ഉത്തരവ് നികുതി വെട്ടിപ്പ് നടത്തി കൃഷി മേഖല ഉപയോഗപ്പെടുത്തി കൊണ്ടിരിക്കുന്നവര്‍ക്കുള്ള ഒരു വലിയ അടികൂടിയാണ്.
ഈ ഉത്തരവ് സംസ്ഥാന വ്യാപകമാക്കണമെന്നാണ് ഷിബുവിന്റെ അടുത്ത ആവശ്യം. അതിനുള്ള ശ്രമങ്ങളുമായി മുന്നോട്ട് പോകുമെന്നും അദ്ദേഹം പറഞ്ഞു. ഇതുമായി ബന്ധപ്പെട്ട് കൃഷി മന്ത്രി ഉള്‍പെടെയുള്ളവരെ സമീപിക്കാനും നീക്കം നടത്തും.