കൊല്ലം: ക്രിസ്മസ്, പുതുവത്സര ആഘോഷങ്ങള്‍ ലക്ഷ്യമിട്ട് ട്രെയിന്‍ മാര്‍ഗം കടത്തിക്കൊണ്ടുവന്ന കര്‍ണാടകത്തില്‍ നിര്‍മിച്ച 15 കുപ്പി ഇന്ത്യന്‍ നിര്‍മിത വിദേശ മദ്യവും ബംഗളൂരുവില്‍ നിന്ന് കടത്തിക്കൊണ്ടുവന്ന 150 കിലോ പാന്‍മസാലയും പിടികൂടി. കൊല്ലം എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ഐ. നൗഷാദിന്റെ നേതൃത്വത്തില്‍ കൊല്ലം റെയില്‍വേ പ്രൊട്ടക്ഷന്ന്‍ ഫോഴ്‌സുമായി ചേര്‍ന്ന് സംയുക്തമായി റെയില്‍വേ സ്റ്റേഷന്‍, ട്രെയിന്‍ പരിശോധനയിലാണ് പിടികൂടിയത്.
പാന്‍ മസാല കടത്തിക്കൊണ്ടുവന്ന ബീഹാര്‍ സ്വദേശി അമീര്‍ ആലത്തിന്റെ(26) പേരില്‍ കോപ്ട ആക്ട് പ്രകാരം കേസെടുത്തു. മദ്യ കുപ്പികള്‍ കടത്തിക്കൊണ്ടുവന്ന ആളിനായി അന്വേഷണം ആരംഭിച്ചു. ബാഗില്‍ ഒളിപ്പിച്ച നിലയിലായിരുന്നു കുപ്പികള്‍. പ്രിവന്റീവ് ഓഫിസര്‍ എ. രാജു, സിവില്‍ എക്‌സൈസ് ഓഫീസര്‍മാരായ അനീഷ് .എം.ആര്‍, എവേഴ്‌സണ്‍ ലാസര്‍, ദിലീപ്കുമാര്‍, വിഷ്ണുരാജ്, അനില്‍ എന്നിവരുടെ നേതൃത്വത്തിലായിരുന്നു പരിശോധന. ആഘോഷങ്ങള്‍ പ്രമാണിച്ച് ജില്ലയില്‍ ജില്ലയില്‍ പരിശോധന ശക്തമായി നടന്നു വരികയാണെന്ന് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ അറിയിച്ചു.