കൊട്ടാരക്കര: കേരളത്തിലെ ഏറ്റവും വലിയ കച്ചവട മേഖലയായി നമ്മുടെ  ആരോഗ്യ മേഖല മാറിയിരിക്കുന്നുവെന്ന് മഹിളാ കോണ്‍ഗ്രസ് സംസ്ഥാന അധ്യക്ഷയും കൊല്ലം ഡി.സി.സി പ്രസിഡന്റുമായ ബിന്ദു കൃഷ്ണ പറഞ്ഞു.
താലൂക്കാശുപത്രിയില്‍ പ്രസവ ചകിത്സയ്ക്കിടയില്‍ മരിച്ച കൊട്ടാരക്കര മുസ്‌ലിം സ്ട്രീറ്റ് വിമലാലയത്തില്‍ ബൈജുവിന്റെ ഭാര്യ സഹിത(31)ന്റെയും ഗര്‍ഭസ്ഥ ശിശുവിന്റെയും മരണത്തിനു കാരണക്കാരായ ഡോക്ടര്‍ക്കും ജീവനക്കാര്‍ക്കുമെതിരെ നടപടി സ്വീകരിക്കണമെന്നാവശ്യപ്പെട്ടു സഹിതയുടെ ഭര്‍ത്താവ്  ബൈജുവും ബന്ധുക്കളും  താലൂക്കാശുപത്രിക്ക് മുന്നില്‍ നടത്തിയ നിരാഹാര സമരം ഉദ്ഘാടനം ചെയ്യുകയായിരുന്നു അവര്‍.
ആശുപത്രികളില്‍ എത്തുമ്പോള്‍ രോഗികള്‍ക്ക് കിട്ടേണ്ടുന്ന സ്വാന്ത്വനം  ജീവനക്കാര്‍ നല്‍കുന്നില്ല. രോഗികളോട് ഇവര്‍ ശത്രുത മനോഭാവത്തോടെ പെരുമാറുകയാണെന്നും ബിന്ദു കൃഷ്ണ പറഞ്ഞു.
സഹിതയുടെയും കുഞ്ഞിന്റെയും ബന്ധുക്കള്‍ക്ക് നീതി കൊടുക്കാന്‍ നിയമപാലകര്‍ തയ്യാറാകണമെന്നും ബിന്ദു കൃഷ്ണ പറഞ്ഞു. ജനതാദള്‍ (എസ് ) സംസ്ഥാന എക്‌സിക്യൂട്ടീവ് അംഗം സുധാകരന്‍ പള്ളത്ത് അധ്യക്ഷനായി.
കെ.പി.സി.സി നിര്‍വാഹക സമിതിയംഗം  അലക്‌സ് മാത്യു, മുനിസിപ്പല്‍ വൈസ് ചെയര്‍മാന്‍ എ. ഷാജു. സേവാദള്‍ നിയോജക മണ്ഡലം ചെയര്‍മാന്‍ ഷിജു പടിഞ്ഞാറ്റിന്‍കര, തോമസ് പണിക്കര്‍, ജില്ലാ പഞ്ചായത്ത് മെമ്പര്‍ ആര്‍. രശ്മി, സജീര്‍, കെ.പി.എം.എസ് നേതാക്കളായ ഉഷാലയം ശിവരാജന്‍, മുളവന മോഹനന്‍, പള്ളിക്കല്‍ സാമുവല്‍ തടങ്ങിയവര്‍ സംസാരിച്ചു.