ന്യൂഡല്‍ഹി: ബി.ജെ.പി സഖ്യത്തെ അട്ടിമറിച്ച് ജാര്‍ഖണ്ഡില്‍ മിന്നുന്ന വിജയം കരസ്ഥമാക്കിയ വിശാലസഖ്യത്തിന്റെ നേതാവ് ഹേമന്ദ് സോറന്‍ അടുത്ത ഞായറാഴ്ച മുഖ്യമന്ത്രിയായി ചുമതലയേല്‍ക്കും. 50 എം.എല്‍.എമാരുടെ പിന്തുണ തനിക്കുണ്ടെന്ന് വ്യക്തമാക്കിയ സോറനെ സര്‍ക്കാര്‍ രൂപീകരിക്കാന്‍ ഗവര്‍ണര്‍ ക്ഷണിച്ചിരുന്നു.

മഹാസഖ്യത്തിലെ പ്രധാന പാര്‍ട്ടികളായ കോണ്‍ഗ്രസ്, ആര്‍.ജെ.ഡി എം.എല്‍.എമാരെ കൂടാതെ ബാബുലാല്‍ മറാന്‍ഡിയുടെ ജെ.വി.എം.പിയും സോറന് പിന്തുണ പ്രഖ്യാപിച്ചിട്ടുണ്ട്. 81അംഗ നിയമസഭയാണ് ജാര്‍ഖണ്ടിലേത്. അതേസമയം റാഞ്ചിയില്‍ നടക്കുന്ന സത്യപ്രതിജ്ഞാ ചടങ്ങില്‍ പങ്കെടുക്കാന്‍ സോറന്‍ കോണ്‍ഗ്രസ് അധ്യക്ഷ സോണിയാ ഗാന്ധിയെ നേരില്‍കണ്ടു ക്ഷണിച്ചു.സോറന്റെ പാര്‍ട്ടിയായ ജാര്‍ഖണ്ഡ് മുക്തി മോര്‍ച്ച(ജെ.എം.എം)ക്ക് 30 സീറ്റാണ് ലഭിച്ചത്.