ന്യൂഡല്‍ഹി: വിവാദ ഉത്തരവ് പുറപ്പെടുവിച്ച മേഘാലയ ഹൈക്കോടതി ജഡ്ജി ജസ്റ്റിസ് എസ്.ആര്‍ സെന്നിനെ പുറത്താക്കണമെന്ന് സി.പി.എം പൊളിറ്റ്ബ്യൂറോ പ്രസ്താവനയില്‍ ആവശ്യപ്പെട്ടു. ജഡ്ജിയുടെ വിവാദ ഉത്തരവിലെ നിരീക്ഷണങ്ങളെ അപലപിച്ച പൊളിറ്റ്ബ്യൂറോ, വിധി ഇന്ത്യന്‍ ഭരണഘടനയുടെ അന്തസിന് നിരക്കുന്നതല്ലെന്ന് അഭിപ്രായപ്പെട്ടു.
ജഡ്ജിയുടെ നിരീക്ഷണങ്ങള്‍ ഇന്ത്യയുടെ വടക്കുകിഴക്കന്‍ സംസ്ഥാനങ്ങളില്‍ സംഘര്‍ഷത്തിനു കാരണമാവും. ഇത്തരത്തില്‍ വിധി പുറപ്പെടുവിച്ച ജസ്റ്റിസ് സെന്നിനെ കോടതിനടപടിയില്‍ നിന്ന് മാറ്റിനിര്‍ത്താന്‍ സുപ്രിംകോടതി ചീഫ്ജസ്റ്റിസ് തയാറാവണം. ഒപ്പം ജസ്റ്റിസ് സെന്നിനെ പാര്‍ലമെന്റ് ഇംപീച്ച്‌മെന്റ് നടപടിക്കു വിധേയമാക്കണമെന്നും സി.പി.എം പ്രസ്താവനയില്‍ ആവശ്യപ്പെട്ടു.
ഇന്ത്യയെ ഇസ്‌ലാമിക രാഷ്ട്രമാക്കാന്‍ ആരും ശ്രമിക്കേണ്ടതില്ലെന്നും അത് രാജ്യത്തെ വലിയ കുഴപ്പത്തില്‍ കൊണ്ടു ചെന്നെത്തിക്കുമെന്നും നരേന്ദ്രമോദിയെ പോലൊരു ഭരണാധികാരിക്കേ ഈ നീക്കത്തെ ചെറുക്കാന്‍ കഴിയുകയുള്ളൂവെന്നുമുള്‍പ്പെടെയുള്ള നിരീക്ഷണങ്ങളാണ് കഴിഞ്ഞദിവസം ജസ്റ്റിസ് സെന്‍ നടത്തിയത്.
ഇന്ത്യാ വിഭജനം മതാടിസ്ഥാനത്തില്‍ ആയതിനാല്‍ യഥാര്‍ഥത്തില്‍ ഇതൊരു ഹിന്ദു രാഷ്ട്രമാണ്. ഇന്ത്യയെ ഒരു ഹിന്ദുരാഷ്ട്രമായി പ്രഖ്യാപിക്കണമായിരുന്നു. പക്ഷേ ഇന്ത്യ മതേതരരാജ്യമായി നിലനില്‍ക്കുകയാണ് ഉണ്ടായതെന്ന് പറഞ്ഞ ജസ്റ്റിസ് സെന്‍ പാകിസ്താന്‍, അഫ്ഗാനിസ്താന്‍, ബംഗ്ലാദേശ് എന്നിവിടങ്ങളില്‍നിന്ന് ഇന്ത്യയിലേക്കു വരുന്ന മുസ്‌ലിം ഇതരവിഭാഗങ്ങള്‍ക്ക് രേഖകള്‍ ആവശ്യപ്പെടാതെ പൗരത്വം നല്‍കാന്‍ നിയമം കൊണ്ടുവരണമെന്നതുള്‍പ്പെടെയുള്ള നിരവധി നിര്‍ദേശങ്ങളും സര്‍ക്കാരിനു നല്‍കിയിരുന്നു.