ന്യൂഡല്‍ഹി: പാമ്പാടി നെഹ്‌റു കോളജ് വിദ്യാര്‍ഥി ജിഷ്ണു പ്രണോയ് ദുരൂഹസാഹചര്യത്തില്‍ മരിച്ച കേസിലെ പ്രതിയും നെഹ്‌റു ഗ്രൂപ്പ് ഉടമയുമായ കൃഷ്ണദാസിന് സുപ്രിംകോടതി ജാമ്യവ്യവസ്ഥയില്‍ ഇളവ് നല്‍കി. ഇതുപ്രകാരം അദ്ദേഹത്തിന് പാലക്കാട് സന്ദര്‍ശിക്കാം. കേരളത്തില്‍ പ്രവേശിക്കാന്‍ അനുവദിക്കണമെന്നാവശ്യപ്പെട്ട് ഒന്നരവര്‍ഷം മുന്‍പ് കൃഷ്ണദാസ് നല്‍കിയ ഹരജിയില്‍ ഇന്നലെയാണ് ജസ്റ്റിസ് എന്‍.വി രമണ അധ്യക്ഷനായ രണ്ടംഗ സുപ്രിംകോടതി ബെഞ്ച് അദ്ദേഹത്തിന് ഉപാധികളോടെ ഇളവ് നല്‍കിയത്.
ജിഷ്ണു പ്രണോയ് മരണമടഞ്ഞ കേസിലും ലക്കിടി കോളജിലെ വിദ്യാര്‍ഥി ഷഹീര്‍ ഷൗക്കത്തലിക്ക് മര്‍ദനമേറ്റ കേസിലും പ്രതിയാണ് നെഹ്‌റു ഗ്രൂപ്പ് ഉടമ കൃഷ്ണദാസ്. അന്വേഷണത്തില്‍ ഇടപെടുകയോ സാക്ഷികളെ സ്വാധീനിക്കുകയോ ചെയ്യരുതെന്നും വ്യവസ്ഥ തെറ്റിച്ചാല്‍ ജാമ്യം റദ്ദാക്കുമെന്നും സുപ്രിംകോടതി അറിയിച്ചു. കേസിലെ വിചാരണ പൂര്‍ത്തിയാവും വരെ കൃഷ്ണദാസിനെ കേരളത്തിലേക്കു വരാന്‍ അനുവദിക്കരുതെന്ന സംസ്ഥാന സര്‍ക്കാരിന്റെ ആവശ്യം നിരസിച്ചാണ് കോടതിയുടെ നടപടി.
ജിഷ്ണു പ്രണോയിയുടെ മരണവുമായി ബന്ധപ്പെട്ട കേസിലും ഷഹീര്‍ ഷൗക്കത്തലിയെ മര്‍ദിച്ച കേസിലും പ്രതിചേര്‍ക്കപ്പെട്ട കൃഷ്ണദാസ് കേരളത്തില്‍ പ്രവേശിക്കരുതെന്ന് 2017 ജൂണിലാണ് സുപ്രിംകോടതി ഉത്തരവിട്ടത്. രണ്ടു കേസിലെയും പ്രതികള്‍ക്കു കേരളാ ഹൈക്കോടതി നല്‍കിയ ജാമ്യം ചോദ്യംചെയ്തു സമര്‍പ്പിച്ച ഹരജികളിലാണ് സുപ്രിംകോടതിയുടെ വിധി. കേസ് നടപടികള്‍ അവസാനിക്കുന്നതു വരെ കൃഷ്ണദാസ് തന്റെ ഓഫിസ് പ്രവര്‍ത്തിക്കുന്ന കോയമ്പത്തൂരില്‍ തങ്ങാനായിരുന്നു കോടതിയുടെ നിര്‍ദേശം. ഈ ഉത്തരവ് ഇന്നലെ രമണയുടെ ബെഞ്ച് ഭേദഗതി ചെയ്യുകയായിരുന്നു. പാമ്പാടി നെഹ്‌റു കോളജിലെ എന്‍ജിനീയറിങ് വിദ്യാര്‍ഥി ആയിരുന്ന ജിഷ്ണുവിനെ 2017 ജനുവരി ആറിനാണ് ഹോസ്റ്റലിലെ കുളിമുറിയില്‍ മരിച്ച നിലയില്‍ കണ്ടെത്തിയത്.