തിരൂരങ്ങാടി: ദേശീയപാതയില്‍ ഓടിക്കൊണ്ടിരിക്കെ കാറിന് മുകളില്‍ മരം വീണു. യാത്രക്കാര്‍ അത്ഭുതകരമായി രക്ഷപെട്ടു. കക്കാടിനും കുരിയാടിനും ഇടയില്‍ ശനിയാഴ്ച രാവിലെ 9:30 നാണ് അപകടം. കക്കാട് നിന്നും കൊളപ്പുറം ഭാഗത്തേക്കു പോവുകയായിരുന്ന മാരുതി കാറിന് മുകളിലാണ് മരം വീണത്. മരം വീണതിനെ തുടര്‍ന്ന് അരമണിക്കൂറോളം ദേശീയപാതയില്‍ ഗതാഗതം തടസപെട്ടു. സംഭവസ്ഥലത്തെത്തിയ സമീപത്തെ സോ മില്‍ തൊഴിലാളികളായ ശെല്‍വന്‍, സുരേഷ്ബാബു, ടൗണ്‍ ടീം പ്രവര്‍ത്തകരായ ഫൈസല്‍ തനിക്കല്‍, അന്‍വര്‍ പിലായില്‍, മന്‍സൂര്‍ ചപ്പങ്ങത്തില്‍ എന്നിവര്‍ മരം വെട്ടി മാറ്റി ഗതാഗതം പുനസ്ഥാപിച്ചു.