വാഷിങ്ടണ്‍: ഖഷോഗി വധത്തില്‍ സഊദി കിരീടാവകാശിയെ കുറ്റക്കാരനാക്കിയുള്ള പ്രമേയം ഒറ്റക്കെട്ടായാണ് സെനറ്റ് പാസാക്കിയത്. യു.എസ് ഫോറിന്‍ റിലേഷന്‍സ് കമ്മിറ്റി ചെയര്‍മാനും ടെന്നസ്സീയില്‍നിന്നുള്ള റിപബ്ലിക്കന്‍ സെനറ്ററുമായ ബോബ് കോര്‍ക്കറാണു പ്രമേയം അവതരിപ്പിച്ചത്. കൊലപാതകത്തില്‍ മുഹമ്മദ് ബിന്‍ സല്‍മാനെ സംരക്ഷിച്ചുകൊണ്ടുള്ള ട്രംപിന്റെ നിലപാടിനു കനത്ത തിരിച്ചടിയായിരിക്കുകയാണ് പ്രമേയം.
ജമാല്‍ ഖഷോഗിയുടെ കൊലപാതകത്തില്‍ സഊദി കിരീടാവകാശി മുഹമ്മദ് ബിന്‍ സല്‍മാന്‍ ഉത്തരവാദിയാണെന്ന് പ്രമേയം ആരോപിക്കുന്നു. കൊലപാതകത്തില്‍ ഉത്തരവാദികളായ മുഴുവന്‍ പേര്‍ക്കും സുതാര്യമായ ശിക്ഷ ഉറപ്പാക്കണമെന്ന് പ്രമേയം സഊദി സര്‍ക്കാരിനോട് ആവശ്യപ്പെടുകയും ചെയ്തു.
പ്രമേയം സെനറ്റ് ഒറ്റക്കെട്ടായി പാസാക്കിയത് ശക്തമായ സന്ദേശമാണെന്ന് ബോബ് കോര്‍ക്കര്‍ പറഞ്ഞു. നമ്മള്‍ പ്രിയംപോലെ കൊണ്ടുനടക്കുന്ന മൂല്യങ്ങളാണ് പ്രമേയം സംസാരിക്കുന്നതെന്നും അദ്ദേഹം കൂട്ടിച്ചേര്‍ത്തു. മുഹമ്മദ് ബിന്‍ സല്‍മാന്റെ ഉത്തരവ് പ്രകാരമല്ല ഈ കൃത്യം നടന്നതെന്നും അദ്ദേഹത്തിന് ഈ കൃത്യത്തില്‍ ആന്തരികമായ പങ്കില്ലെന്നും തീര്‍പ്പിലെത്തണമെങ്കില്‍ നിങ്ങള്‍ക്കു മനഃപ്പൂര്‍വം അന്ധതനടിക്കുക തന്നെ വേണ്ടിവരുമെന്ന് സൗത്ത് കരോലിനയില്‍നിന്നുള്ള റിപബ്ലിക്കന്‍ സെനറ്റര്‍ ലിന്‍ഡ്‌സേ ഗ്രഹാം സെനറ്റില്‍ വ്യക്തമാക്കി.സെനറ്റ് ഒറ്റക്കെട്ടായി പ്രമേയം പാസാക്കിയതോടെ രണ്ടുവഴികള്‍ മാത്രമാണ് ഇനി ട്രംപിനു മുന്നിലുള്ളത്. ഒന്നുകില്‍ പ്രമേയത്തില്‍ ഒപ്പുവച്ച് യു.എസ് കോണ്‍ഗ്രസിന്റെ കൂടെനില്‍ക്കുക, അല്ലെങ്കില്‍ വീറ്റോ ചെയ്ത് സഊദിയെ പിണക്കാതിരിക്കുക.
രണ്ടായാലും രാഷ്ട്രീയപരമായി ട്രംപിന് കനത്ത തിരിച്ചടിയാണ് പ്രമേയം സമ്മാനിക്കുക.നേരത്തെ, കൊലപാതകത്തില്‍ സഊദി കിരീടാവകാശിക്ക് പങ്കുണ്ടെന്ന് സി.ഐ.എ വൃത്തങ്ങള്‍ ആരോപിച്ചിരുന്നു. ആരോപണം പിന്നീട് ട്രംപ് നിഷേധിച്ചു. അത്തരത്തിലൊരു നിഗമനത്തിലെത്താന്‍ ഒരു തെളിവുമില്ലെന്നായിരുന്നു ട്രംപിന്റെ പ്രതികരണം.