പേരാമ്പ്ര: ചേനോളി റോഡില്‍ പ്രവര്‍ത്തിക്കുന്ന ഭാരത് ഫിനാന്‍ഷ്യല്‍ ഇന്‍ക്ലൂഷന്‍ ലിമിറ്റഡ് എന്ന ധനകാര്യ സ്ഥാപനത്തില്‍നിന്ന് 7.50 ലക്ഷം രൂപ കവര്‍ന്ന സംഭവത്തിലെ മറ്റു പ്രതികള്‍ കൂടി അറസ്റ്റില്‍.
ഇതോടെ നാലു പ്രതികളില്‍ മുന്‍ ജീവനക്കാരനടക്കം മൂന്നുപേര്‍ പിടിയിലായി. മുന്‍ ജീവനക്കാരന്‍ രാമനാട്ടുകര ചിറക്കാംകുന്ന് കോളനി തൃക്കണശ്ശേരി മിഥുന്‍ (ചക്കര-25), മലപ്പുറം പുളിക്കല്‍ കല്ലട വിഷ്ണു (അപ്പു-23), മലപ്പുറം പുളിക്കല്‍ കൊളത്താടിയില്‍ ശ്യംമോന്‍ (27) എന്നിവരെയാണ് പേരാമ്പ്ര പൊലിസ് അറസ്റ്റ് ചെയ്തത്.
പുളിക്കല്‍ സ്വദേശിയായ അജീഷിനെയാണ് ഇനിയും പിടികൂടാനുള്ളത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു. സാമ്പത്തിക ക്രമക്കേടിനെ തുടര്‍ന്ന് ജോലിയില്‍ നിന്ന് ഒഴിവാക്കിയ മിഥുന്‍ മറ്റു രണ്ടു പ്രതികളായ ശ്യാംമോന്‍, വിഷ്ണു എന്നിവരും സ്ഥാപനത്തിലെ മറ്റൊരു ജീവനക്കാരന്റെ സഹായത്തില്‍ പണത്തിന്റെ വിവരങ്ങളറിഞ്ഞ് മോഷണം നടത്തുകയായിരുന്നു. താക്കോല്‍ സൂക്ഷിക്കുന്ന വിവരങ്ങള്‍ അറിയാവുന്ന മിഥുന്‍ കൂട്ടുപ്രതികള്‍ക്കൊപ്പം നവംബര്‍ 10ന് രാത്രി ലോക്കറോടെ പണം മോഷ്ടിക്കുകയായിരുന്നു.
ശേഷം സംഘത്തില്‍ ചേര്‍ന്ന അജീഷുമൊപ്പം പണവുമായി വയനാട്, ഡല്‍ഹി, ബംഗളൂരു, തമിഴ്‌നാട് തുടങ്ങിയ സ്ഥലങ്ങളില്‍ തങ്ങി. ഇതിനിടയില്‍ മിഥുന്‍ പൊലിസ് വലയിലായി. ഇയാളില്‍നിന്നു ലഭിച്ച വിവരങ്ങളുടെ അടിസ്ഥാനത്തില്‍ മറ്റു പ്രതികളെ പിടികൂടുകയായിരുന്നു.
ചാലിയാര്‍ പുഴയില്‍ എടവണ്ണാപ്പാറ ഭാഗത്ത് ഉപേക്ഷിച്ച ലോക്കര്‍ കണ്ടെടുക്കാനുണ്ട്. സംഭവത്തില്‍ മൂന്നര ലക്ഷം രൂപയും രണ്ടു കാറും കട്ടിങ് മെഷീനും പൊലിസ് കണ്ടെടുത്തു. പൊലിസ് ഇന്‍സ്‌പെക്ടര്‍ കെ.പി സുനില്‍കുമാര്‍, സബ് ഇന്‍സ്പക്ടര്‍ കെ. ദിലീഷ് സാഠോ, എ.എസ്.ഐ രാധാകൃഷ്ണന്‍ എന്നിവരുടെ നേതൃത്വത്തിലുള്ള പൊലിസ് സംഘമാണ് പ്രതികളെ പിടികൂടിയത്.