തിരൂരങ്ങാടി: ജിംനേഷ്യത്തിന്റെ മറവില്‍ കഞ്ചാവ് വില്‍പന നടത്തുന്ന യുവാവിനെ എക്‌സൈസ് സംഘം കൈയോടെ പിടികൂടി. വെന്നിയൂര്‍ കൊടക്കല്ല് സ്വദേശി ചെനക്കല്‍ സക്കീറി (35)നെയാണ് രണ്ടരകിലോയോളം കഞ്ചാവുമായി പരപ്പനങ്ങാടി എക്‌സൈസ് റെയ്ഞ്ച് ഇന്‍സ്‌പെക്ടര്‍ എം.ഒ വിനോദിന്റെ നേതൃത്വത്തില്‍ എക്‌സൈസ് സംഘം അറസ്റ്റ് ചെയ്തത്. വ്യാഴാഴ്ചരാത്രി 11.30ന് മമ്പുറം ബൈപാസ് റോഡിലെ സുന്നി മസ്ജിദ് പരിസരത്ത്‌വച്ചാണ് ഇയാള്‍ പിടിയിലായത്. വില്‍പനയ്ക്ക് കൊണ്ടുവന്ന 2.3 കിലോഗ്രാം കഞ്ചാവിന് പുറമെ, സ്റ്റിറോയിഡുകളുടെ 50 ആംപ്യുളുകളും, ഉത്തേജക മരുന്നുകളും പിടികൂടിയതായും, ബൈക്ക് കസ്റ്റഡിയിലെടുത്തതായും എക്‌സൈസ് സംഘം പറഞ്ഞു. എക്‌സൈസ് മലപ്പുറം രഹസ്യാന്വേഷണ വിഭാഗം നല്‍കിയ വിവരത്തിന്റെ അടിസ്ഥാനത്തില്‍ പരിശോധന നടത്തിയപ്പോഴാണ് ബൈക്കില്‍ വില്‍പനയ്ക്കായി കൊണ്ടുവന്ന കഞ്ചാവുമായി ഇയാള്‍ പിടിയിലായത്.  വര്‍ഷങ്ങളായി ചെമ്മാട് ടൗണില്‍ ജിംനേഷ്യം സ്ഥാപനം നടത്തിവരികയാണ് സക്കീര്‍. രണ്ടുവര്‍ഷത്തോളമായി തമിഴ്‌നാട് അതിര്‍ത്തി പ്രദേശമായ കമ്പത്ത്. ആന്ധ്ര എന്നിവിടങ്ങളില്‍നിന്നും കഞ്ചാവ് കൊണ്ടുവന്ന് ചെറുപാക്കറ്റുകളാക്കി വില്‍പന നടത്തുകയാണെന്ന് എക്‌സൈസ് സംഘം പറഞ്ഞു.
ജിംനേഷ്യത്തിലെത്തുന്ന യുവാക്കളാണ് മുഖ്യ ഇടപാടുകാര്‍. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.  പ്രിവന്റീവ് ഓഫിസര്‍മാരായ സൂരജ് (ഇന്റലിജന്‍സ് ബ്യൂറോ), പ്രജേഷ് കുമാര്‍, പി. ബിജു, ലതീഷ്, സിവില്‍ എക്‌സൈസ് ഓഫിസര്‍മാരായ ശിഹാബുദ്ദീന്‍, പ്രദീപ്കുമാര്‍, പ്രമോദാസ്, നിതിന്‍, വനിതാ ഓഫിസര്‍മാരായ മായാദേവി, ലിഷ, സിന്ദു ഡ്രൈവര്‍ സാജിത് തുടങ്ങിയവരും പരിശോധനയില്‍ പങ്കെടുത്തു.