കൊച്ചി: മുന്‍മുഖ്യമന്ത്രി ഉമ്മന്‍ചാണ്ടിയെ സോളാര്‍ കമ്മിഷന്‍ വീണ്ടും വിസ്തരിച്ചേക്കും. ഉമ്മന്‍ചാണ്ടിയുള്‍പ്പെടെയുള്ള 15 സാക്ഷികളെ വീണ്ടും വിസ്തരിക്കണമെന്നാവശ്യപ്പെട്ട് വിവിധ കക്ഷികള്‍ ഇന്നലെ നല്‍കിയ ഹരജി സോളാര്‍ അന്വേഷണ കമ്മിഷന്‍ ജസ്റ്റിസ് ജി.ശിവരാജന്‍ ഫയലില്‍ സ്വീകരിച്ചു.

നാളെ ഇതുസംബന്ധിച്ച് വാദം കേട്ട് ആരെയൊക്കെ വീണ്ടും വിസ്തരിക്കണമെന്ന കാര്യത്തില്‍ അന്തിമതീരുമാനം എടുക്കും. മുന്‍മന്ത്രി കെ.ബാബു, യു.ഡി.എഫ് കണ്‍വീനര്‍ പി.പി.തങ്കച്ചന്‍ എന്നിവരുള്‍പ്പെടെ 22 പേരെ പുതുതായും കമ്മിഷന്‍ വിസ്തരിച്ചേക്കും. ഉമ്മന്‍ചാണ്ടിയെ വീണ്ടും വിസ്തരിക്കുന്നതില്‍ എതിര്‍ സത്യവാങ്മൂലം സമര്‍പ്പിക്കാന്‍ സമയം വേണമെന്ന അഭിഭാഷകന്‍ അജയ് ബെന്‍ ജോസിന്റെ അപേക്ഷ അംഗീകരിച്ച കമ്മിഷന്‍ 11 വരെ സമയം അനുവദിച്ചു.

സരിത എസ്.നായരുടെ വെളിപ്പെടുത്തലിന്റെയും ഉമ്മന്‍ചാണ്ടിയുമായി താന്‍ അഞ്ചുതവണ ഫോണില്‍ ബന്ധപ്പെട്ടെന്ന അഡ്വ. ഫെനി ബാലകൃഷ്ണന്റെ മൊഴിയുടെയും അടിസ്ഥാനത്തിലാണ് ഉമ്മന്‍ചാണ്ടിയെ വീണ്ടും വിസ്തരിക്കണമെന്ന ആവശ്യം ഉയര്‍ന്നത്. ഉമ്മന്‍ചാണ്ടി മുഖ്യമന്ത്രിയായിരിക്കെ പൊളിറ്റിക്കല്‍ സെക്രട്ടറിയായിരുന്ന വാസുദേവ ശര്‍മ്മ കെ.എസ്,അഡീഷണല്‍ പ്രൈവറ്റ് സെക്രട്ടറിയായിരുന്ന ആര്‍.കെ.ബാലകൃഷ്ണന്‍, ഗണ്‍മാന്മാരായിരുന്ന പ്രദിപ്,രവി, അഡീഷണല്‍ പ്രൈവറ്റ്‌സെക്രട്ടറി സുരേന്ദ്രന്‍, മുന്‍ എം.എല്‍.എ ബാബു പ്രസാദ്, തോമസ് കൊണ്ടോടി, പൊലിസ് ആസ്ഥാനത്തെ സൈബര്‍സെല്‍  എ.സി, ബി.എസ്.എന്‍.എല്‍ നോഡല്‍ ഓഫിസര്‍, ഡിവൈ.എസ്.പിമാരായ മുഹമ്മദ് ഷാഫി, റെജി ജേക്കബ്, ജോസഫ്, ആര്യാടന്‍ മന്ത്രിയായിരിക്കെ സ്‌പെഷല്‍ പ്രൈവറ്റ് സെക്രട്ടറിയായിരുന്ന പി.ആര്‍ രാമചന്ദ്രന്‍ നായര്‍, ഡെല്‍ഹിയില്‍ തോമസ് കുരുവിളയ്ക്ക് പണം കൈമാറിയ ധീരജ്, കോട്ടയത്തെയും ആലപ്പുഴയിലെയും കലക്ടര്‍മാര്‍, നോബി അഗസ്റ്റിന്‍ എന്നിവരെ പുതുതായി വിസ്തരിക്കണമെന്നാണ് ആവശ്യം.

ഇന്ന് ഡിവൈ.എസ്.പി വി.അജിതിനെ കമ്മിഷന്‍ വിസ്തരിക്കും.കെ.പി.സി.സി സെക്രട്ടറി എന്‍.സുബ്രഹ്മണ്യനെ നാളെയും സോളാര്‍ കമ്മിഷന്‍ വിസ്തരിക്കും.