നെന്മാറ: നെല്ലിയാമ്പതി റോഡില്‍ കാട്ടാന ശല്യം പതിവാകുന്നു. തമ്പുരാന്‍ കാടിനും അയ്യപ്പന്‍ ക്ഷേത്രത്തിനും ഇടയിലുള്ള വലിയ വളവിലാണ് കാട്ടാന റോഡില്‍ നിലയുറപ്പിച്ചത്. ഇതുമൂലം മണിക്കൂറുകളോളം ഗതാഗതം തടസ്സപ്പെട്ടു. ഇന്നലെ പന്ത്രണ്ട് മണിക്ക് നിലയുറപ്പിച്ച കാട്ടുകൊമ്പന്‍ രണ്ട് മണിക്കൂറോളം ഗതാഗതം തടസ്സപ്പെടുത്തി. കെ.എസ്.ആര്‍.ടി.സി.ബസ്സും, ടൂറിസ്റ്റ് വാഹനങ്ങളും ഉള്‍പ്പെടെ ഗതാഗത തടസ്സത്തില്‍ കുടുങ്ങി. കടുത്ത മഞ്ഞ് വീഴ്ചയില്‍ റോഡ് കാണാത്തതിനാല്‍ പലവാഹനങ്ങളും ആനയുടെ അടുത്ത് വരെ എത്തിയിരുന്നു.
ഉടന്‍ വാഹനങ്ങള്‍ പിറകോട്ടെടുത്തതിനാല്‍ വലിയ അപകടം ഒഴിവായി. മണിക്കൂറുകള്‍ക്ക് ശേഷം കാട്ടാന ഉള്‍വലിഞ്ഞതിന് ശേഷം ഗതാഗതം പുനരാരംഭിച്ചു.