ലണ്ടന്‍: പ്രീമിയര്‍ ലീഗ് കിരീടത്തിലേക്ക് കുതിക്കുന്ന ലിവര്‍പൂളിന് വന്‍ ജയം. രണ്ടാം സ്ഥാനക്കാരായ ലെസ്റ്റര്‍ സിറ്റിയെ എതിരില്ലാത്ത നാല് ഗോളിനാണ് ലിവര്‍പൂള്‍ തകര്‍ത്തു വിട്ടത്. 

ഇതോടെ ഒരു മത്സരം ബാക്കി നില്‍ക്കെ ലെസ്റ്ററുമായി 13 പോയിന്റിന്റെ വ്യത്യാസത്തിലെത്താന്‍ ലിവര്‍പൂളിന് കഴിഞ്ഞു. റോബര്‍ട്ട് ഫിര്‍മീഞ്ഞോയുടെ ഇരട്ട ഗോളിന്റെ കരുത്തിലായിരുന്നു ലിവര്‍പൂള്‍ ജയം സ്വന്തമാക്കിയത്. 31, 74 മിനുട്ടുകളിലായിരുന്നു ഫിര്‍മീഞ്ഞോയുടെ ഗോളുകള്‍. 

ജെയിംസ് മില്‍നര്‍ (71), അലക്‌സാണ്ടര്‍ അര്‍ണോള്‍ഡ് (78) എന്നിവരും ലിവര്‍പൂളിന് വേണ്ടി ഗോളുകള്‍ കണ്ടെത്തി. 18 മത്സരത്തില്‍ നിന്ന് ലിവര്‍പൂളിന് 52 പോയിന്റാണ് ഇപ്പോഴുള്ളത്. 

മറ്റൊരു മത്സരത്തില്‍ മികച്ച ജയം സ്വന്തമാക്കി മാഞ്ചസ്റ്റര്‍ യുനൈറ്റഡ്. 4-1 എന്ന സ്‌കോറിന് ന്യൂ കാസിലിനെയാണ് യുനൈറ്റഡ്  തകര്‍ത്തത്. മാഞ്ചസ്റ്ററിന് വേണ്ടി അന്തോണി മാര്‍ഷ്യല്‍ (24, 51),  മാസന്‍ ഗ്രീന്‍വുഡ് (36), മാര്‍ക്കസ് റാഷ്‌ഫോര്‍ഡ് (41) എന്നിവര്‍ ഗോള്‍ നേടി. 

17-ാം മിനുട്ടില്‍ മാട്ടി ലാങ്സ്റ്റഫാണ് ന്യൂ കാസിലിന് വേണ്ടി ആശ്വാസ ഗോള്‍ നേടിയത്. ഇതോടെ 19 മത്സരത്തില്‍ നിന്ന് 28 പോയിന്റുമായി യുനൈറ്റഡ് ഏഴാം സ്ഥാനത്തെത്തി.