അമ്പലപ്പുഴ: വീട്ടമ്മയെ കബളിപ്പിച്ച് വീട്ടില്‍ കയറി സ്വര്‍ണാഭരണം മോഷ്ടിച്ച പ്രതി അറസ്റ്റില്‍. പുന്നപ്ര വടക്ക് പഞ്ചായത്ത് പറവൂര്‍ വാടക്കല്‍ പാല്യത്തയ്യില്‍ വീട്ടില്‍ മാജോ (18) നെയാണ് പുന്നപ്ര പൊലിസ് അറസ്റ്റ് ചെയ്തത്. വ്യാഴാഴ്ച ഉച്ചയോടെയായിരുന്നു കേസിനാസ്പദമായ സംഭവം നടന്നത്. വാടക്കല്‍ തുമ്പത്ത് വീട്ടില്‍ സാബുവിന്റെ വീട്ടുമുറ്റത്ത് എത്തിയ പ്രതി സാബുവിന്റെ ഭാര്യ വീട്ടുമുറ്റത്ത് കുട്ടിയെ കളിപ്പിക്കുന്നത് കാണുകയും പിന്നീട് ഇയാള്‍ വീടിന് പുറകുവശത്തെത്തി മതില്‍ ചാടി കടന്ന് തുറന്നുകിടന്ന അടുക്കളയില്‍ കൂടി മുറിക്കുള്ളില്‍ കയറി അലമാരയില്‍ സൂക്ഷിച്ചിരുന്ന രണ്ടു പവന്റെ സ്വര്‍ണാഭരണം മോഷ്ടിക്കുകയുമായിരുന്നു.
വൈകുന്നേരം നാലുമണിയോടെ അലമാര തുറന്നുകിടക്കുത് കണ്ട വീട്ടുകാര്‍ അലമാരി പരിശോധിച്ചപ്പോഴാണ് സ്വര്‍ണാഭരണം മോഷണം പോയ വിവരം അറിയുന്നത്. ഉടന്‍ തന്നെ പുന്നപ്ര പൊലിസിനെ വിവരം അറിയിക്കുകയും സംഭവസ്ഥലത്തെത്തിയ പൊലിസ് നടത്തിയ പരിശോധനയില്‍ സമീപത്തെ വീടുകളിലെ സി.സി.ടി.വിയില്‍നിന്ന് വ്യക്തമായി കാണാന്‍ കഴിഞ്ഞില്ലെങ്കിലും ഒരാള്‍ മതില്‍ ചാടി പോകുന്നതായി കണ്ടെത്തി.
രൂപ സാദൃശ്യം തിരിച്ചറിഞ്ഞ പൊലിസ് അടിപിടി കേസുകളില്‍ പ്രതിയായ മാജോയെ കേന്ദ്രീകരിച്ച് അന്വേഷണം ആരഭിക്കുകയും ഇന്നലെ വൈകുന്നേരം വാടക്കല്‍ കടപ്പുറത്തുനിന്ന് ഇയാളെ പിടികൂടുകയുമായിരുന്നു. പിന്നീട് നടന്ന ചോദ്യം ചെയ്യലില്‍ ഇയാള്‍ മോഷണം നടത്തിയ വിവരം പൊലിസിനോട് വെളിപെടുത്തി. പ്രതിയെ ഇന്ന് അമ്പലപ്പുഴ മജിസ്‌ട്രേട്ട് കോടതിയില്‍ ഹാജരാക്കും.
എസ്.ഐമാരായ അജയന്‍ മോഹനന്‍, അബ്ദ്ുല്‍ റഹീം, എ.എസ്.ഐമാരായ അശോകന്‍, സിദ്ദീക്ക്, സീനിയര്‍ പൊലിസ് ഓഫിസര്‍മാരായ അജീഷ്, ബിജോയ്, നിഥിന്‍, ബോബന്‍ എന്നിവരാണ് പൊലിസ് സംഘത്തില്‍ ഉണ്ടായിരുന്നത്.