ബാലുശ്ശേരി: തെങ്ങുകയറ്റ മെഷീന്‍ ഉപയോഗിച്ചു തെങ്ങില്‍ കയറുന്നതിനിടെ അപകടത്തില്‍പ്പെട്ടയാളെ സാഹസികമായി രക്ഷപ്പെടുത്തി. മലയില്‍ രമേശനാണ് തെങ്ങില്‍ കയറുന്നതിനിടെ മെഷീന്‍ തകരാറായി അപകടത്തില്‍പ്പെട്ടത്. സമീപത്തെ മറ്റൊരു തെങ്ങില്‍ തേങ്ങയിടുന്നതിനിടെ സംഭവംകണ്ട അരീക്കുഴി മീത്തല്‍ പ്രഭാകരനാണ് രമേശനെ ചുമലിലേറ്റി സാഹസികമായി താഴെയിറക്കിയത്. മൂത്തന്‍കണ്ടി രാജന്റെ പറമ്പില്‍ തേങ്ങ പറിക്കുന്നതിനിടെയായിരുന്നു സംഭവം. എസ്.സി-എസ്.ടി മോര്‍ച്ച ജില്ലാ വൈസ് പ്രസിഡന്റും സാമൂഹ്യ പ്രവര്‍ത്തകനുമാണ് പ്രഭാകരന്‍. സാഹസികമായി സുഹൃത്തിനെ രക്ഷപ്പെടുത്തിയ പ്രഭാകരനെ നാട്ടുകാര്‍ അഭിനന്ദിച്ചു.