മണ്ണാര്‍ക്കാട്: തമിഴ്‌നാട്ടില്‍ അറസ്റ്റിലായ മാവോയിസ്റ്റ് സംഘത്തില്‍ കഴിഞ്ഞ വര്‍ഷം മണ്ണാര്‍ക്കാട്ടെ വനമേഖലയില്‍ ഏറ്റുമുട്ടല്‍ നടത്തിയവരെ അന്വേഷണത്തിന്റെ ഭാഗമായി വിട്ടുകിട്ടുവാന്‍ കേരള പൊലിസ് നടപടികളാരംഭിച്ചു. 2015 നവമ്പര്‍ 29നാണ് മണ്ണാര്‍ക്കാട് കോട്ടോപ്പാടം ഗ്രാമപഞ്ചായത്തിലെ തിരുവിഴാംകുന്ന് അമ്പലപ്പാറ പളളിശ്ശേരി വനമേഖലയില്‍ പൊലീസും മാവോയിസ്റ്റുകളും തമ്മില്‍ നേര്‍ക്കുനേര്‍ മണിക്കൂറുകളോളം നീണ്ടുനിന്ന ഏറ്റുമുട്ടലുണ്ടായത്. 28ാം തിയ്യതി പളളിശ്ശേരിയിലെ ആദിവാസി കോളനിയില്‍ മാവോയിസ്റ്റുകളെത്തി എന്ന വിവരത്തെ തുടര്‍ന്ന് തണ്ടര്‍ ബോള്‍ട്ട് സംഘം വനത്തില്‍ തിരച്ചില്‍ നടത്തുന്നതിനിടെയാണ് വെടിവെപ്പുണ്ടായത്. ഈ സംഘത്തിലുള്‍പ്പെട്ട റീന ജോയ്‌സിനെയാണ് തമിഴ്‌നാട്ടിലെ കരൂര്‍ വെങ്കമേട് കണക്കപ്പളള തെരുവില്‍ നിന്നും തമിഴ്‌നാട് ക്യു ബ്രാഞ്ച് പൊലിസ് അറസ്റ്റ് ചെയ്തത്. നിലവില്‍ തമിഴ്‌നാട്ടില്‍ തടവില്‍ കഴിയുന്ന റീന ജോയ്‌സിനെ അന്വേഷണത്തിന്റെ ഭാഗമായി കസ്റ്റഡിയില്‍ വിട്ടുകിട്ടുവാനാണ് നടപടികള്‍ ആരംഭിച്ചത്. നടപടി ക്രമങ്ങള്‍ പൂര്‍ത്തിയാക്കി അടുത്ത ദിവസം തന്നെ പാലക്കാട് കോടതിയില്‍ ഹാജരാക്കാനാണ് സാധ്യത. റീന ജോയ്‌സിനെ കസ്റ്റഡിയില്‍ ലഭിച്ചാല്‍ അമ്പലപ്പാറയിലെയും, അട്ടപ്പാടി കടുകമണ്ണയിലെയും വെടിവെപ്പും, സൈലന്റ് വാലി ഫോറസ്റ്റ് സ്റ്റേഷന്‍ തീവെപ്പ് കേസുമുള്‍പ്പെടെ തെളിയിക്കാന്‍ കഴിയുമെന്ന പ്രതീക്ഷയിലാണ് പൊലിസ്.