കോഴിക്കോട്: വിദ്യാര്‍ഥികളുടെ യാത്രാസുരക്ഷ ഉറപ്പാക്കാന്‍ സംസ്ഥാനത്തെ സ്‌കൂള്‍ വാഹനങ്ങള്‍ക്ക് അനുവദിച്ച പരമാവധി വേഗ പരിധി മണിക്കൂറില്‍ 150 കിലോമീറ്റര്‍! കേള്‍ക്കുന്നവര്‍ മൂക്കത്ത് വിരല്‍വയ്ക്കുമെങ്കിലും സംസ്ഥാനത്തെ വിദ്യാഭ്യാസവകുപ്പിന് ഇക്കാര്യത്തില്‍ സംശയമൊന്നുമില്ല. കഴിഞ്ഞദിവസം വിദ്യാഭ്യാസവകുപ്പ് പുറത്തിറക്കിയ സര്‍ക്കുലറിലാണ് വിചിത്ര നിര്‍ദേശം.

സ്‌കൂള്‍ വാഹനങ്ങളുടെ സുരക്ഷ ഉറപ്പാക്കാന്‍ ബാലാവകാശ കമ്മിഷന്റെ നിര്‍ദേശത്തെ തുടര്‍ന്ന് ഡി.പി.ഐയാണ് കഴിഞ്ഞ ആറിന് സര്‍ക്കുലര്‍ പുറത്തിറക്കിയത്. സ്‌കൂള്‍വാഹനങ്ങളില്‍ വിദ്യാര്‍ഥികളുടെ സുരക്ഷ ഉറപ്പാക്കുന്നതിനു 17 നിര്‍ദേശങ്ങളാണ് സര്‍ക്കുലറിലുള്ളത്. വിദ്യാര്‍ഥികളുടെ സുരക്ഷ ഉറപ്പുവരുത്തുന്നതിന് ഓട്ടോറിക്ഷകള്‍ ഒഴികെയുള്ള എല്ലാ സ്‌കൂള്‍ വാഹനങ്ങള്‍ക്കും വേഗപരിധി മണിക്കൂറില്‍ 150 കിലോമീറ്റര്‍വരെ സാധ്യമാകുന്ന വിധത്തില്‍ സ്പീഡ് ഗവേണര്‍ ഘടിപ്പിക്കണമെന്നാണ് ഇതില്‍ 17ാ മത്തെ നിര്‍ദേശം! മണിക്കൂറില്‍ 150 കി.മീ എന്നത്  നിലവില്‍ സംസ്ഥാനത്തെ റോഡുകളില്‍ ഓടുന്ന ഭൂരിഭാഗം വാഹനങ്ങള്‍ക്കും ആസാധ്യമായ  വേഗതയാണെന്നതാണു മറ്റൊരുകാര്യം.     

ഡി.പി.ഐ പുറത്തിറക്കിയ സര്‍ക്കുലര്‍ എ.ഇ.ഒമാര്‍ തങ്ങളുടെ കീഴിലുള്ള സ്‌കൂളുകളിലേക്കും കഴിഞ്ഞദിവസം നല്‍കിയിരുന്നു. അതേ സമയം മോട്ടോര്‍ വാഹനവകുപ്പ് സ്‌കൂള്‍ വാഹനങ്ങള്‍ക്ക് അനുവദിച്ച പരമാവധി വേഗത മണിക്കൂറില്‍ 50 കി.മീ ആണ്. നേരത്തേ മണിക്കൂറില്‍ 40 ആയിരുന്നത്  ഈയിടെ 50 കി. മീ ആക്കി ഉയര്‍ത്തുകയായിരുന്നു.

അനാദായകരമായ വിദ്യാലയങ്ങള്‍ സംബന്ധിച്ചും ഈയിടെ ഡി. പി. ഐ പുറത്തിറക്കിയ സര്‍ക്കുലര്‍ ആശയകുഴപ്പം സൃഷ്ടിച്ചിരുന്നു. ഒടുവില്‍ മൂന്ന് സര്‍ക്കുലര്‍ കൂടി പിന്നാലെ ഇറക്കിയാണ് ഇക്കാര്യത്തില്‍ വ്യക്തത വരുത്താനായത്.