തേഞ്ഞിപ്പലം: കാലിക്കറ്റ് സര്‍വകലാശാലാ ഗോള്‍ഡന്‍ ജൂബിലി ആഘോഷങ്ങളുടെ സമാപനം 17ന് ചാന്‍സലര്‍കൂടിയായ ഗവര്‍ണര്‍ ജസ്റ്റിസ് (റിട്ട) പി.സദാശിവം ഉദ്ഘാടനം ചെയ്യും. ഉന്നത വിദ്യാഭ്യാസ വകുപ്പ് മന്ത്രി ഡോ.കെ.ടി ജലീല്‍ അധ്യക്ഷനാകും. പി.കെ കുഞ്ഞാലിക്കുട്ടി എം.പി മുഖ്യപ്രഭാഷണം നിര്‍വഹിക്കും. ഇന്ത്യന്‍ സയന്‍സ് അക്കാദമി ഫെലോ ആയി തെരഞ്ഞെടുക്കപ്പെട്ട ഡോ.എം.സാബുവിനെ ആദരിക്കും.
ഗോള്‍ഡന്‍ ജൂബിലി റിപ്പോര്‍ട്ട് സിന്‍ഡിക്കേറ്റ് അംഗം കെ.കെ ഹനീഫ അവതരിപ്പിക്കും. വൈകിട്ട് അഞ്ചിന് കേരള കലാമണ്ഡലം വിദ്യാര്‍ഥികള്‍ അവതരിപ്പിക്കുന്ന നൃത്തശില്‍പ്പം, സി.ഡി.എം.ആര്‍.പി കുട്ടികളുടെ മാര്‍ഷ്യല്‍ ആര്‍ട്ട് പ്രദര്‍ശനം, സര്‍വകലാശാലാ ഫോക്‌ലോര്‍ പഠനവിഭാഗം അവതരിപ്പിക്കുന്ന പാവ കഥകളി, തോല്‍പാവകൂത്ത് എന്നിവ ഉണ്ടാകും. 1968ല്‍ രൂപീകൃതമായ കാലിക്കറ്റ് സര്‍വകലാശാലയുടെ ഒരു വര്‍ഷത്തിലധികം നീണ്ടുനിന്ന ആഘോഷങ്ങള്‍ക്കാണ് 17ന് സമാപനം കുറിക്കുന്നത്.