ജിദ്ദ: ഫാര്‍മസികള്‍ക്കുപുറമെ സഊദിയില്‍ ആരോഗ്യമേഖല പൂര്‍ണമായും സ്വദേശിവല്‍ക്കരിക്കുന്നു. ഇതുമായി ബന്ധപ്പെട്ട നടപടികള്‍ തൊഴില്‍, സാമൂഹികക്ഷേമ മന്ത്രാലയങ്ങള്‍ ഊര്‍ജിതമാക്കി. സഊദി വിഷന്‍- 2030ന്റെ ഭാഗമായാണ് സ്വദേശിവല്‍ക്കരണം നടപ്പാക്കുന്നത്.

ഫാര്‍മസിമേഖല സ്വദേശിവല്‍ക്കരിക്കാന്‍ തീരുമാനിച്ചതോടെ 15,000 തൊഴിലവസരങ്ങളാണ് വിദേശികള്‍ക്ക് ഇല്ലാതായത്. 2022ഓടെ ഈ മേഖലയില്‍ 100 ശതമാനം സ്വദേശിവല്‍ക്കരണം നടപ്പാക്കാനാണ് തീരുമാനം. ഇതിനുപുറമെ താമസസൗകര്യം ഒരുക്കുന്ന ഹോട്ടലുകള്‍, ഊര്‍ജമേഖല എന്നിവിടങ്ങളിലും സ്വദേശിവല്‍ക്കരണം നടപ്പാക്കാന്‍ തീരുമാനിച്ചിട്ടുണ്ട്. ഹോട്ടലുകളില്‍ അടുത്തവര്‍ഷം ജനുവരി മുതല്‍ സ്വദേശിവല്‍ക്കരണം നടപ്പാക്കും.

വിഷന്‍- 2030ന്റെ ഭാഗമായി സ്വകാര്യമേഖലയില്‍ 41 ലക്ഷം സ്വദേശികള്‍ക്ക് തൊഴില്‍നല്‍കുമെന്ന് തൊഴില്‍മന്ത്രാലയം അറിയിച്ചു. നേരത്തേ മൊബൈല്‍ കടകള്‍, വാഹനവില്‍പന, റെന്റ് എ കാര്‍ എന്നീ മേഖലകളിലും സ്വദേശിവല്‍ക്കരണം പ്രഖ്യാപിച്ചിരുന്നു. അതിനിടെ, സ്വദേശിവല്‍ക്കരണം നടപ്പാക്കാത്ത 3,178 മൊബൈല്‍ ഫോണ്‍ കടകള്‍ക്കെതിരേ നടപടി സ്വീകരിച്ചതായി തൊഴില്‍മന്ത്രാലയം അറിയിച്ചു. 1,812 കടകള്‍ അടച്ചുപൂട്ടി. തൊഴില്‍വകുപ്പിനുപുറമെ ആഭ്യന്തര, വാണിജ്യം, വാര്‍ത്താവിനിമയം, നഗര, ഗ്രാമകാര്യ വകുപ്പുകളും പരിശോധനകളില്‍ പങ്കെടുക്കുന്നുണ്ട്.