അഗളി : അഗളി എ.എസ്.പി നവനീത്ശര്‍മ്മ ഐ.പി.എസ്സിന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ എ.എസ്.പിയും സ്‌ക്വാഡും അഗളി പൊലീസും ചേര്‍ന്ന് നാടന്‍ തോക്കുമായി യുവാവിനെ അറസ്റ്റ് ചെയ്തു. ചിറ്റൂര്‍ അമ്മിയാനിക്കല്‍ വീട്ടില്‍ തോമസിന്റെ മകന്‍ കുറുവമ്പാടി ബാബുവാണ് പൊലിസ് പിടിയിലായത്. രഹസ്യവിവരം ലഭിച്ചതിന്റെ അടിസ്ഥാനത്തില്‍ ബാബു വാടകക്ക് താമസിച്ചിരുന്ന കാരറ ഷാപ്പുംപടിയിലുള്ള വീടും പരിസരവും റെയ്ഡ് നടത്തിയപ്പോഴാണ് വീടിനോട് ചേര്‍ന്ന് ചാക്കില്‍ പൊതിഞ്ഞ് ഒളിപ്പിച്ച നിലയില്‍ നാടന്‍ തോക്ക് അന്വേഷണ സംഘം കണ്ടെത്തിയത്.
അന്വേഷണത്തിനിടെ ഈ കേസിലെ മറ്റൊരു പ്രതിയായ മോഹനന്‍ എന്നയാള്‍ സംഭവസ്ഥലത്ത് നിന്ന് ഓടി രക്ഷപ്പെട്ടു. ഇയാള്‍ക്കെതിരേയും കേസ് രജിസ്റ്റര്‍ ചെയ്തതായി പൊലിസ് അറിയിച്ചു. അഗളി പൊലിസ് തുടര്‍ നടപടികള്‍ സ്വീകരിച്ചു.