കൊല്ലം (കെ.ടി.മാനു മുസ്‌ലിയാര്‍ നഗര്‍): മദ്‌റസാ പ്രസ്ഥാനവും മറ്റു പ്രബോധന പ്രവര്‍ത്തനങ്ങളും വഴി സമസ്ത ആഗോള തലത്തില്‍ മാതൃകയായി മാറിയിരിക്കുകയാണെന്ന് സമസ്ത ജന. സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍ പറഞ്ഞു. കേരളത്തില്‍ സമസ്തക്കു നേതൃത്വം നല്‍കിയ പൂര്‍വിക പണ്ഡിതന്‍മാരും സാദാത്തുക്കളും നടത്തിയ സമര്‍പ്പിത പ്രവര്‍ത്തനങ്ങളുടെ ഫലമാണ് മദ്‌റസാ പ്രസ്ഥാനത്തിലൂടെ ആസ്വദിക്കുന്നത്. രാജ്യത്തെ ഇതര സംസ്ഥാനങ്ങളിലും ലോക മുസ്‌ലിം രാഷ്ട്രങ്ങളിലും നിലവിലുള്ള മതവിദ്യാഭ്യാസ സമ്പ്രദായങ്ങളേക്കാള്‍ കേരളത്തില്‍ സമസ്ത നേട്ടം കൈവരിച്ചിട്ടുണ്ട്. മതബോധം സമൂഹത്തില്‍ വളര്‍ത്തിയെടുക്കുക എന്നതാണ് മദ്‌റസാ പ്രസ്ഥാനത്തിന്റെ ലക്ഷ്യമെന്നും ഇതിനു വേണ്ടി പ്രയത്‌നിക്കുന്ന അധ്യാപകരുടെ സേവനം മഹത്തരമാണെന്നും ആലിക്കുട്ടി മുസ്‌ലിയാര്‍ പറഞ്ഞു.