അതിരമ്പുഴ: മാന്നാനം കെ.ഇ കോളജില്‍ നടക്കുന്ന ദേശീയ മനശാസ്ത്ര പ്രദര്‍ശനം ഇന്ന് സമാപിക്കുമെന്ന്  കെ.ഇ മനശാസ്ത്ര വിഭാഗം മേധാവി പ്രൊഫ. ഫാ.ജോണ്‍സന്‍ ജോസഫ് അറിയിച്ചു.
 ഇന്ത്യയില്‍ വികസിപ്പിച്ചെടുത്ത കുറ്റാന്വേഷണ മനഃശാസ്ത്ര രംഗത്ത് ഉപയോഗിക്കുന്ന ബ്രെയിന്‍ പ്രൊഫൈലിങ് ആദ്യമായാണ് പ്രദര്‍ശനത്തില്‍ ഉള്‍പ്പെടുത്തിയിരിക്കുന്നത്.
കൂടാതെ ഫോറന്‍സിക് സൈക്കോളജി, ഇ.ഇ.ജി തുടങ്ങിയവ എക്‌സിബിഷിന്റെ പ്രധാന ആകര്‍ഷണങ്ങളാണ്. അന്ധ വിശ്വാസങ്ങള്‍ക്കെതിരെ ശാസ്ത്രീയമായ തെളിവുകള്‍ നിരത്തി ഓജോ ബോര്‍ഡ്, പ്രേതബാധ പോലെയുള്ള  മനുഷ്യന്‍ ഭയക്കുന്ന കാര്യങ്ങളും അവതരിപ്പിക്കുന്നു.മാനസിക പ്രശ്‌നങ്ങളാലും പഠന വൈകല്യങ്ങളാലും ബുദ്ധിമുട്ട് അനുഭവിക്കുന്നവര്‍ക്ക് മനശാസ്ത്ര സഹായങ്ങളും ലഭ്യമാണ്. രജതജൂബിലി ആഘോഷത്തിന്റെ ഭാഗമായി സംഘടിപ്പിച്ച പ്രദര്‍ശനത്തിലും അനുബന്ധപരിപാടികളും ഇന്ന്  ഉച്ചയ്ക്ക് നടക്കുന്ന സമാപന സമ്മേളനത്തോടെ അവസാനിക്കും.