പട്ടാമ്പി:  താലൂക്ക് വികസന സമിതി യോഗത്തില്‍ വേണ്ടത്ര വകുപ്പ് ഉദ്യോഗസ്ഥരും ജനപ്രതിനിധികളും എത്തുന്നില്ലെന്ന പരാതി നില നില്‍ക്കുമ്പോഴും ടൗണിലെ ഗാതഗതകുരുക്ക് പൊല്ലാപ്പ് ചര്‍ച്ചയായി തുടരുന്നു.
പൊലിസില്ലാത്തതിനാല്‍ ട്രാഫിക് കുരുക്ക് ചര്‍ച്ച ചെയ്യാന്‍ കഴിയുന്നില്ലെന്ന് പഞ്ചായത്ത് അധ്യക്ഷന്‍മാര്‍ ഉന്നയിക്കുന്നത്. എന്നാല്‍ റോഡിന്റെ ഉടമസ്ഥാവകാശം ചര്‍ച്ച ചെയ്യാന്‍ ഭരണാധികാരികള്‍ ഇല്ലാത്തതും മറ്റൊരു ചര്‍ച്ചക്കും വഴിയൊരുക്കുന്നു.
നഗരത്തിലെ ഗതാഗത നിയന്ത്രണം അനാഥമായാണ് നീങ്ങുന്നതെന്ന് ബ്ലോക്ക് പഞ്ചായത്ത് പ്രസിഡന്റ് കമ്മുകുട്ടി എടത്തോള്‍ യോഗത്തില്‍ ചൂണ്ടികാട്ടി. കിഴായൂര്‍ നമ്പ്രം റോഡിന്റെ പ്രവൃത്തി നടത്താനുള്ള തടസം അവകാശ തര്‍ക്കമാണന്ന് യോഗത്തില്‍ ആരോപിച്ചു.
എന്നാല്‍ മുമ്പ് ബ്ലോക്ക് പഞ്ചായത്താണ് ഫണ്ട് വച്ചിരുന്നതെന്നും നഗരസഭയുടെ ആവിര്‍ഭാവത്തോടെ തങ്ങള്‍ക്ക് അതിന് കഴിയില്ലെന്ന് പറഞ്ഞപ്പോള്‍ കൈമാറ്റം ചെയ്തിട്ടില്ലെന്ന് നഗരസഭ അറിയിച്ചു. ഇതുസംബന്ധിച്ച് തീരുമാനമെടുക്കാന്‍ നഗരഭരണാധികാരികള്‍ വികസന സമിതി യോഗത്തില്‍ ഉണ്ടായിരുന്നില്ല. അത് കൊണ്ട് തന്നെ സ്ഥിരമായി പങ്കെടുക്കാത്തവരുണ്ടെന്ന പരാതിയും ഉയര്‍ന്നു.
അതെ സമയം താലൂക്ക് സമിതിയില്‍ വന്നിട്ടും പരാതി പറഞ്ഞിട്ടും പരിഹാരമില്ലെന്ന് വിളയൂര്‍ പഞ്ചായത്ത് പ്രസിഡന്റ് കെ.  ുരളീധരന്‍ യോഗത്തില്‍ ഉന്നയിച്ചു. റോഡ് നവീകരണത്തിന്റെ ഭാഗമായി വിളയൂര്‍- കൂരാച്ചിപ്പടി സെന്ററുകളില്‍ അഴുക്ക് ചാല്‍ നിര്‍മിക്കാത്തത് ഒരുവര്‍ഷമായി സമിതിയില്‍ പറഞ്ഞിട്ടും പരിഹാരമായില്ലെന്ന് അദ്ദേഹം ചൂണ്ടികാട്ടി. താലൂക്കിലെ സര്‍വെയര്‍മാരുടെ കുറവ് നികത്താനും വില്ലേജുകളില്‍ മിനിമം ജീവനക്കാരെ നിയമിക്കാനും പരിശ്രമിക്കുമെന്ന് എം.എല്‍.എ യോഗത്തില്‍ ഉറപ്പ് നല്‍കി.