കൊച്ചി: മന്ത്രി ഡോ. കെ.ടി ജലീലിന്റെ ബന്ധുനിയമനവുമായി ബന്ധപ്പെട്ട് മുഖ്യമന്ത്രി നിയമസഭയെ തെറ്റിദ്ധരിപ്പിച്ചോയെന്ന് വ്യക്തമാക്കണമെന്ന് യൂത്ത് ലീഗ് സംസ്ഥാന പ്രസിഡന്റ് സയ്യിദ് മുനവ്വറലി ശിഹാബ് തങ്ങളും ജനറല്‍ സെക്രട്ടറി പി.കെ ഫിറോസും ആവശ്യപ്പെട്ടു. യൂത്ത് ലീഗ് സംസ്ഥാന കമ്മിറ്റിയുടെ യുവജന യാത്രയോടനുബന്ധിച്ചു നടത്തിയ വാര്‍ത്താസമ്മേളനത്തില്‍ സംസാരിക്കുകയായിരുന്നു ഇരുവരും. ഇതു സംബന്ധിച്ച് ലഭ്യമായ രേഖകള്‍ യൂത്ത് ലീഗ് നേതാക്കള്‍ വാര്‍ത്താസമ്മേളനത്തില്‍ പുറത്തുവിട്ടു. നാലിന് കെ. മുരളീധരന്‍ എം.എല്‍.എ നിയമസഭയില്‍ ബന്ധുനിയമനവുമായി ബന്ധപ്പെട്ട് കൊണ്ടുവന്ന അടിയന്തിര പ്രമേയത്തില്‍ നിയമനത്തില്‍ യാതൊരു ചട്ടലംഘനവും നടന്നിട്ടില്ലെന്നാണ് മുഖ്യമന്ത്രി വ്യക്തമാക്കിയത്.
എന്നാല്‍ 11ന് പാറക്കല്‍ അബ്ദുല്ല എം.എല്‍.എക്ക് മന്ത്രി ജലീല്‍ നല്‍കിയ മറുപടിയില്‍ പൊതുമേഖലാ സ്ഥാപനത്തിലെ ഉന്നതതല നിയമനത്തിന് ദേശീയ അംഗീകാരമുള്ള വിദഗ്ധ സമിതി ശുപാര്‍ശ ആവശ്യമാണെന്നും എന്നാല്‍ കെ.ടി അദീബിന്റെ നിയമനത്തില്‍ ഈ ചട്ടം പാലിച്ചില്ലെന്നുമാണ് പറയുന്നത്. ഒരേ വിഷയത്തില്‍ രണ്ടു ഉത്തരമാണ് മന്ത്രിയും മുഖ്യമന്ത്രിയും സഭയില്‍ പറഞ്ഞത്. ഒന്നുകില്‍ മുഖ്യമന്ത്രി സഭയെ തെറ്റിദ്ധരിപ്പിച്ചിരിക്കുകയാണ്, അല്ലെങ്കില്‍ മന്ത്രി കള്ളം പറയുന്നുവെന്ന് വേണം മനസിലാക്കാന്‍. മുഖ്യമന്ത്രി സഭയെ തെറ്റിദ്ധരിപ്പിച്ചുവെങ്കില്‍ അക്കാര്യം ഗൗരവമാണെന്ന് പി.കെ ഫിറോസ് പറഞ്ഞു.
ബന്ധുനിയനവുമായി ബന്ധപ്പെട്ട് മുസ്‌ലിം ലീഗിന്റെയും യു.ഡി.എഫിന്റെയും ഭാഗത്ത് നിന്ന് ശക്തമായ പിന്തുണയാണ് യൂത്ത് ലീഗിന് ലഭിക്കുന്നത്.
യൂത്ത് ലീഗ് വിജിലന്‍സിന് നല്‍കിയ പരാതിയില്‍ പുതിയ നിയമഭേദഗതി അനുസരിച്ച് പരാതി അന്വേഷിക്കണമോയെന്ന് തീരുമാനിക്കേണ്ടത് സര്‍ക്കാരാണ്. ഇക്കാര്യത്തിലുള്ള സര്‍ക്കാരിന്റെ മറുപടി ലഭിച്ചുകഴിഞ്ഞാല്‍ ഇക്കാര്യത്തിലുള്ള നിയമപരമായ പോരാട്ടം യൂത്ത് ലീഗ് നടത്തുമെന്നും നേതാക്കള്‍ വ്യക്തമാക്കി.