ഔറംഗാബാദ്: മഹാരാഷ്ട്രയില്‍ മന്ത്രിസഭാ വികസനത്തിനു പിന്നാലെ രാജി പ്രഖ്യാപിച്ച് എന്‍.സി.പി എം.എല്‍.എ. ബീഡ് ജില്ലയിലെ എം.എല്‍.എ പ്രകാശ് സോളങ്കിയാണ് രാജിവെച്ചത്. രാഷ്ട്രീയപ്രവര്‍ത്തനത്തിന് യോഗ്യതയില്ലെന്ന് ബോധ്യപ്പെട്ടതിനാലാണ് രാജിവെക്കാന്‍ തീരുമാനിച്ചതെന്ന് അദ്ദേഹം പറഞ്ഞു.

തന്റെ പാര്‍ട്ടിയിലുള്ള ഏതെങ്കിലും നേതാവുമായി ഒരുതരത്തിലുള്ള പ്രശ്‌നങ്ങളും ഇല്ലെന്ന് അദ്ദേഹം വ്യക്തമാക്കി.ചൊവ്വാഴ്ച രാജി സമര്‍പ്പിക്കുമെന്നും തുടര്‍ന്ന് രാഷ്ട്രീയത്തില്‍നിന്ന് മാറിനില്‍ക്കാനാണ് തീരുമാനമെന്നും അദ്ദേഹം പറഞ്ഞു. മന്ത്രിസ്ഥാനം ലഭിക്കാത്തതിനെ തുടര്‍ന്നാണ് എം.എല്‍.എ സ്ഥാനം രാജിവെക്കുന്നതെന്ന ആരോപണം അദ്ദേഹം തള്ളി.തന്റെ തീരുമാനം എന്‍സിപി നേതാക്കളെ അറിയിച്ചിട്ടുണ്ട്. ചൊവ്വാഴ്ച ഉച്ചകഴിഞ്ഞ് നിയമസഭാ സ്പീക്കറെ കണ്ട് രാജിക്കത്ത് നല്‍കുമെന്നും പ്രകാശ് സോളങ്കി പറഞ്ഞു.

ശിവസേന, എന്‍സിപി, കോണ്‍ഗ്രസ് സഖ്യത്തിന്റെ മഹാവികാസ് അഘാടിയുടെ നേതൃത്വത്തിലുള്ള ഉദ്ദവ് താക്കറെ മന്ത്രിസഭ 36 മന്ത്രിമാരെ പുതുതായി ഉള്‍പ്പെടുത്തി തിങ്കളാഴ്ച വികസിപ്പിച്ചിരുന്നു.