പേരാമ്പ്ര: ചിട്ടയായ പഠന ക്രമവും അടങ്ങാത്ത ആഗ്രഹവുമുണ്ടെങ്കില്‍ ഏതൊരു പരീക്ഷയും വിജയിക്കാനാവുമെന്ന് സിവില്‍ സര്‍വിസ് റാങ്ക് ജേതാവ് ഹംന മറിയം പറഞ്ഞു.
റീ സെറ്റ് ടാലെന്റ്‌സ് പ്രതിഭാ പോഷണ പദ്ധതിയുടെ ഭാഗമായി കടിയങ്ങാട് കമ്മ്യൂനിറ്റി ഹാളില്‍ ഗ്രാമീണ മേഖലയിലെ കുട്ടികള്‍ക്കായി നടത്തിയ സിവില്‍ സര്‍വിസ് ഓറിയന്റേഷന്‍ പ്രോഗ്രാം ഉദ്ഘാടനം ചെയ്തു സംസാരിക്കുകയായിരുന്നു ഈ വര്‍ഷത്തെ സിവില്‍ സര്‍വിസ് പരീക്ഷയില്‍ 28-ാം റാങ്ക് ജേതാവായ ഹംന. ഗ്രാമീണ മേഖലയിലെ  വിദ്യാഭ്യാസ സാമൂഹിക പുരോഗതി ലക്ഷ്യം വച്ച് പ്രവര്‍ത്തിക്കുന്ന ജനകീയ കൂട്ടയ്മയായ റീ സെറ്റിന്റെ ആഭിമുഖ്യത്തിലാണ് റീ സെറ്റ് ടാലന്‍സ് പ്രതിഭാ പോഷണ പദ്ധതി.
ചടങ്ങില്‍ റീ സെറ്റ് ചെയര്‍മാന്‍ സി.എച്ച് ഇബ്രാഹിം കുട്ടി അധ്യക്ഷനായി. ഹംന മറിയത്തിന് സി.എച്ച് ഇബ്രാഹിംകുട്ടി ഉപഹാരം നല്‍കി. പ്രോജക്ട് ഡയറക്ടര്‍ ടി. സലിം, കെ.എം സാബു, ആര്‍. സീന, പി. കുഞ്ഞമ്മദ് മാസ്റ്റര്‍, സൗഫി താഴെക്കണ്ടി, കെ.എം നാണു, ശിഹാബ് കന്നാട്ടി സംസാരിച്ചു.
നീറ്റ് പരീക്ഷയില്‍ ചങ്ങരോത്ത് പഞ്ചയത്തില്‍ നിന്ന് ഏറ്റവും ഉയര്‍ന്ന മാര്‍ക്കോടെ പാസായി എം.ബി.ബി.എസിന് അഡ്മിഷന്‍ നേടിയ വിസ്മയ രവീന്ദ്രനെയും ഏറ്റവും മികച്ച റാങ്ക് നേടി കോഴിക്കോട് എന്‍.ഐ.ടിയില്‍ പ്രവേശനം നേടിയ ചിത്ര പാര്‍വതിയെയും ചടങ്ങില്‍ ആദരിച്ചു .