കോഴിക്കോട്: സുന്നി യുവജന സംഘം സംസ്ഥാന കമ്മിറ്റി ഇന്നു മുതല്‍ ഏപ്രില്‍ 10 വരെ ആചരിക്കുന്ന അംഗത്വ കാംപയിനിന് തുടക്കമായി. കൊല്ലം ആശ്രാമം മൈതാനിയില്‍ നടന്ന സമസ്ത കേരള ജംഇയ്യതുല്‍ മുഅല്ലിമീന്‍ 60ാം വാര്‍ഷിക മഹാസമ്മേളനത്തില്‍ പതിനായിരങ്ങളെ സാക്ഷിയാക്കി സയ്യിദ് സാദിഖലി ശിഹാബ് തങ്ങള്‍ക്ക് അംഗത്വം നല്‍കി പാണക്കാട് സയ്യിദ് ഹൈദരലി ശിഹാബ് തങ്ങള്‍ ആണ് കാംപയിനിന് തുടക്കം കുറിച്ചത്. ഇന്ന് ജില്ലാതലങ്ങളിലും നാളെ മണ്ഡലം തലങ്ങളിലും മൂന്നിന് മുനിസിപ്പല്‍, പഞ്ചായത്ത് തലങ്ങളിലും പ്രമുഖ വ്യക്തിത്വങ്ങളെ സുന്നി യുവജന സംഘത്തിലേക്ക് ചേര്‍ത്തി അംഗത്വ വിതരണത്തിന് തുടക്കം കുറിക്കും.
ജനുവരി 4ന് സംസ്ഥാന വ്യാപകമായി മെമ്പര്‍ഷിപ്പ് ഡേ ആചരിക്കും. സമസ്ത കേരള ജംഇയ്യത്തുല്‍ ഉലമയുടെ ആദര്‍ശം അംഗീകരിക്കുന്ന സാമൂഹിക സാംസ്‌കാരിക പ്രവര്‍ത്തനങ്ങളില്‍ തല്‍പരരായ തീവ്ര, വിധ്വംസക, രാജ്യദ്രോഹ പ്രവര്‍ത്തനങ്ങളുമായി ബന്ധമില്ലാത്ത 22 വയസ് പൂര്‍ത്തിയായ അഞ്ച് ലക്ഷം വിശ്വാസികള്‍ക്ക് വ്യവസ്ഥാപിതമായി അംഗത്വം നല്‍കുകയാണ് കാംപയിന്‍ ലക്ഷ്യം വയ്ക്കുന്നത്.
തുടര്‍ന്ന് ജനുവരിയില്‍ ശാഖാ തലങ്ങളിലും ഫെബ്രുവരിയില്‍ മുനിസിപ്പല്‍, പഞ്ചായത്ത് തലങ്ങളിലും മാര്‍ച്ച് ആദ്യ പകുതിയില്‍ മണ്ഡലം, മേഖലാ തലങ്ങളിലും അവസാന പകുതിയില്‍ ജില്ലാ തലങ്ങളിലും പുതിയ കമ്മിറ്റികള്‍ നിലവില്‍ വരും. ഏപ്രില്‍ പത്തിനകമാണ് സംസ്ഥാന കമ്മിറ്റി നിലവില്‍ വരിക.