തളിപ്പറമ്പ്: തളിപ്പറമ്പില്‍ ബി.ജെ.പി പ്രവര്‍ത്തകര്‍ക്കുനേരെ സ്റ്റീല്‍ ബോംബ് ആക്രമണം. രണ്ടു പേര്‍ക്ക് പരുക്ക്. ബൈക്കില്‍ സഞ്ചരിക്കുകയായിരുന്ന തൃച്ചംബരം സ്വദേശികളായ ഉമേഷ് (35), ദാസന്‍ (50) എന്നിവര്‍ക്കാണ് പരുക്കേറ്റത്. ഇന്നലെ രാത്രി പത്തോടെ മൂത്തേടത്ത് ഹൈസ്‌കുളിന് പിറകില്‍ തളിപ്പറമ്പ് ഹെഡ് പോസ്റ്റ് ഓഫിസിന് മുന്നിലായിരുന്നു സംഭവം. ഇരുവരേയും ആദ്യം ലൂര്‍ദ്ദ് ആശുപത്രിയിലും പിന്നീട് പരിയാരം മെഡിക്കല്‍ കോളജിലും പ്രവേശിപ്പിച്ചു.
ഉമേഷിന് നെഞ്ചിലും ദാസന് കാലിലുമാണ് പരുക്ക്. ഉമേഷാണ് ബൈക്ക് ഓടിച്ചിരുന്നത്. സംഭവത്തില്‍ വധശ്രമത്തിന് കേസെടുക്കുമെന്ന് ഡിവൈ.എസ്.പി കെ.വി വേണുഗോപാല്‍ പറഞ്ഞു. വന്‍സ്ഥോടനശബ്ദവും കേട്ടതിനെ തുടര്‍ന്ന് നാട്ടുകാരും തളിപ്പറമ്പ് അഡീ. എസ്.ഐ കെ.കെ പ്രശോഭിന്റെ നേതൃത്വത്തില്‍ പൊലിസും സ്ഥലത്തെത്തിയിരുന്നു. പൊലിസാണ് പരുക്കേറ്റവരെ ആശുപത്രിയിലെത്തിച്ചത്.