ന്യൂഡല്‍ഹി: ഇന്ത്യന്‍ താരങ്ങളുടെ ദയനീയ പ്രകടനത്തെ പരിഹസിച്ച എഴുത്തുകാരി ശോഭ ഡെയുടെ ട്വീറ്റ് വിവാദമാകുന്നു. ഇന്ത്യന്‍ താരങ്ങള്‍ റിയോയിലേക്ക് പോയത് സെല്‍ഫിയെടുക്കാനും സ്ഥലങ്ങള്‍ കാണാനാണെന്നുമായിരുന്നു ശോഭ ട്വിറ്ററില്‍ എഴുതിയത്. മികച്ച പ്രകടനം കാഴ്ച്ചവച്ചു പുറത്തായ ഇന്ത്യയുടെ മുന്‍ ഒളിംപിക്‌സ് മെഡല്‍ താരമായ അഭിനവ് ബിന്ദ്രയെയടക്കം ശോഭ പരിഹസിച്ചു.

ഇതുവരെ ഇന്ത്യന്‍ താരങ്ങള്‍ ഒരു മെഡലും സ്വന്തമാക്കിയില്ല. എല്ലാ അത്‌ലറ്റുകളും സെല്‍ഫിയെടുത്തു തിരികെ വരാനാണെങ്കില്‍ എന്തിനാണ് ഇത്ര പണം ചെലവാക്കുന്നതെന്നു അവര്‍ ചോദിച്ചു.

ബാഡ്മിന്റണ്‍ താരം ജ്വാല ഗുട്ട ശോഭയുടെ ട്വീറ്റിനോടു പ്രതികരിച്ചു. നിങ്ങളെ പോലെയുള്ള ആളുകളുടെ മനോഭാവം മാറുമ്പോള്‍ ഒരു പക്ഷേ ഇന്ത്യയുടെ ഭാവിയും മാറിയേക്കാമെന്ന് ജ്വാല തിരിച്ചടിച്ചു. മുന്‍ ഹോക്കി താരം വീരന്‍ രാസ്‌ക്കിന്‍ഹയും ട്വീറ്റിനോടു പ്രതികരിച്ചു. മിസിസ് ഡെ ഹോക്കി പിച്ചില്‍ 60 മിനുട്ട് ഒടുകയോ ബിന്ദ്രയെപ്പോലെ റൈഫിള്‍ ഒന്നു പൊക്കുകയോ ചെയ്തിട്ട് വാ തുറന്നാല്‍ മതിയെന്നാണ് വീരന്‍ മറുപടി നല്‍കിയത്.