ദമസ്‌കസ്: സിറിയയില്‍ യു.എസ് നടത്തിയ വ്യോമാക്രമണത്തില്‍ റഖയിലെ 43 സിവലിയന്മാര്‍ കൊല്ലപ്പെട്ടു. നിരവധി പേര്‍ക്ക് പുരുക്കേറ്റു. ജനവാസ കേന്ദ്രം ലക്ഷ്യമാക്കി നടത്തിയ ആക്രമണത്തിലാണ് ഇവര്‍ കൊല്ലപ്പെട്ടതെന്ന് സിറിയന്‍ വാര്‍ത്താ ഏജന്‍സിയായ സന റിപ്പോര്‍ട്ട് ചെയ്തു.
ദിവസങ്ങളായി തുടരുന്ന ആക്രമണത്തില്‍ റഖയിലെ ജനജീവിതം തകര്‍ന്നുവെന്നും ജനങ്ങള്‍ താമസിക്കുന്ന പ്രദേശങ്ങളിലായിതിനാല്‍ കൊല്ലപ്പെടുന്നവരുടെ എണ്ണം ദിനംപ്രതി വര്‍ധിക്കുകയാണെന്ന് റഖയിലെ റെഡ് ക്രസന്റ് പ്രതിനിധി അസ്അദ മാധ്യമങ്ങളോട് പറഞ്ഞു. ദിവസങ്ങള്‍ക്ക് മുന്‍പ് റഖയിലെ ദേശീയ ആശുപത്രിയില്‍ നിരോധിക്കപ്പെട്ട ഫോസ്ഫറസ് ബോംബിട്ടിരുന്നു. ഇവിടങ്ങളിലെ വൈദ്യുതി, ആംബുലന്‍സ് സംവിധാനങ്ങള്‍, ചില വാര്‍ഡുകള്‍ എന്നിവ ആക്രമണത്തില്‍ തകര്‍ന്നുവെന്ന് അസ്അദ പറഞ്ഞു. ഒരു ലക്ഷത്തോളം സാധാരണക്കാര്‍ക്ക് ഈ ആശുപത്രിയില്‍ സേവനം നല്‍കുന്നുണ്ട്. ആശുപത്രിയിലോ സമീപ പ്രദേശങ്ങളിലോ ഐ.എസിന്റെ സാന്നിധ്യം ഇതുവരെ റിപ്പോര്‍ട്ട് ചെയ്തിട്ടില്ല. സാധാരണക്കാരെ ലക്ഷ്യമാക്കിയാണ് ഇവിടങ്ങളില്‍ യു.എസ് ആക്രമണമെന്നാണ് പരാതി.