ഗുരുവായൂര്‍: ഫാസിസ്റ്റ്-തീവ്രവാദ പ്രവര്‍ത്തനങ്ങള്‍ നടത്തുന്നവര്‍ മതങ്ങളുടെ അന്തസ്സത്ത ഉള്‍ക്കൊള്ളാത്തവരാണെന്നും അതിനാല്‍ ഇത്തരം പ്രവര്‍ത്തനങ്ങള്‍ക്ക് മതത്തിന്റെ മേല്‍വിലാസം നല്‍കരുതെന്നും വഖഫ് ബോര്‍ഡ് ചെയര്‍മാന്‍ പാണക്കാട് റഷീദലി ശിഹാബ് തങ്ങള്‍ പറഞ്ഞു. എസ്.കെ.എസ്.എസ്.എഫ് ജില്ലാ കമ്മിറ്റി നടത്തുന്ന ഭാരതീയം ചരിത്രസ്മൃതിയാത്രയുടെ ഉദ്ഘാടനം ഗുരുവായൂരില്‍ നിര്‍വഹിക്കുകയായിരുന്നു അദ്ദേഹം.
ഏതെങ്കിലും മതനാമധാരിയുടെ വികലമായ പ്രവര്‍ത്തനത്തെ ആ മതത്തിന്റെ പ്രവര്‍ത്തനമായി കാണരുത്. അത്തരം വ്യക്തികളെ സമൂഹത്തില്‍ ഒറ്റപ്പെടുത്തണം. രാജ്യത്തിന്റെ ഏകോദര സാഹോദര്യം നിലനിര്‍ത്താന്‍ ഏവര്‍ക്കും ബാധ്യതയുണ്ട്. യഥാര്‍ത്ഥ മതവിശ്വാസി മനുഷ്യനെ മനുഷ്യനായി കാണണമെന്നും റഷീദലി ശിഹാബ് തങ്ങള്‍ പറഞ്ഞു.