മുംബൈ: ഗോള്‍ മഴയില്‍ മുങ്ങി കേരള ബ്ലാസ്റ്റേഴ്‌സ്. ഐ.എസ്.എല്ലില്‍ മുംബൈക്കെതിരേ ആറു ഗോള്‍ വഴങ്ങിയ ബ്ലാസ്റ്റേഴ്‌സിന്റെ റിസര്‍വ് ടീം കൊച്ചിയില്‍ തുടങ്ങിയ കെ.പി.എല്ലിലും ആറു ഗോളിന് പരാജയപ്പെട്ടു. കെ.പി.എല്ലിന്റെ ആദ്യ മത്സരത്തില്‍ ആര്‍.എഫ്.സി കൊച്ചിനോടാണ് ബ്ലാസ്റ്റേഴ്‌സ് 6-2 എന്ന സ്‌കോറിന് പരാജയപ്പെട്ടത്. ഐ.എസ്.എല്ലില്‍ 6-1 നാണ് മുംബൈയോട് ബ്ലാസ്റ്റേഴ്‌സ് പരാജയപ്പെട്ടത്.
ഐ.എസ്.എല്ലിലെ 12-ാം മത്സരത്തിലാണ് ബ്ലാസ്റ്റേഴ്‌സിനെ ഗോള്‍മഴയില്‍ മുക്കി മുംബൈ സംഹാരതാണ്ഡവമാടിയത്. നാലു ഗോളുമായി മൊദു സൊഗുയാണ് കേരളത്തിന്റെ അന്തകനായത്. 12-ാം മിനുട്ടില്‍ സൊഗുയുടെ സുന്ദരമായ ഗോളിലൂടെയാണ് മുംബൈ തുടങ്ങിയത്. ആദ്യ ഗോളിന്റെ ഞെട്ടല്‍ മാറും മുമ്പ് 15-ാം മിനുട്ടില്‍ സൊഗു വീണ്ടും ലക്ഷ്യം കണ്ടു. 27-ാം മിനുട്ടില്‍ ഡുംങ്കല്‍ ഗോള്‍ കണ്ടെത്തി മത്സരത്തിലേക്ക് തിരിച്ചുവരുമെന്ന് തോന്നിച്ചെങ്കിലും പിന്നീട് മുംബൈയുടെ വക ഗോള്‍വര്‍ഷമായിരുന്നു. 30-ാം മിനുട്ടില്‍ സുന്ദരമായൊരു ഹെഡറിലൂടെ ഗോള്‍ കണ്ടെത്തി സൊഗു ഹാട്രിക് നേട്ടം പൂര്‍ത്തിയാക്കി. ആദ്യ പകുതി അവസാനിക്കുമ്പോള്‍ മുംബൈക്ക് രണ്ട് ഗോളിന്റെ ലീഡുണ്ടായിരുന്നു. ആദ്യ പകുതിയുടെ അവസാന മിനുട്ടില്‍ സക്കീര്‍ ചുവപ്പ് കണ്ട് പുറത്തായത് ബ്ലാസ്റ്റേഴ്‌സിന് തിരിച്ചടിയായി. പത്തുപേരുമായി ചുരുങ്ങിയ കേരളം തീര്‍ത്തും പ്രതിരോധത്തിലായി. രണ്ട് ഗോളിന്റെ ലീഡുണ്ടായിരുന്ന മുംബൈ ബ്ലാസ്റ്റേഴ്‌സിനെ വെള്ളംകുടിപ്പിച്ചുകൊണ്ടേയിരുന്നു.
70-ാം മിനുട്ടില്‍ റാഫേല്‍ ബസ്‌തോസും ഗോള്‍ നേടി സ്‌കോര്‍ 4-1 എന്ന നിലയിലെത്തിച്ചു. 89-ാം മിനുട്ടില്‍ പരാഗ്വേ താരം മതിയാസ് മിയാബാഹെയുടെ സുന്ദരമായൊരു ഷോട്ട് വലയിലായതോടെ സ്‌കോര്‍ 5-1 എന്ന നിലയിലെത്തി. മത്സരത്തിന്റെ അവസാന മിനുട്ടില്‍ സൊഗു നാലാം ഗോളും കണ്ടെത്തി ബ്ലാസ്റ്റേഴ്‌സിന്റെ ശവപ്പെട്ടിയില്‍ അവസാനത്തെ ആണിയും അടിച്ച് മത്സരം പൂര്‍ത്തിയാക്കി. സീസണിലെ ഏറ്റവും വലിയ സ്‌കോറിന് പരാജയപ്പെട്ടതോടെ പൂര്‍ണ പരാജയവുമായി ബ്ലാസ്റ്റേഴ്‌സ് സീസണിലെ ഏറ്റവും മോശം ടീമുകളിലൊന്നായി മാറി.
മികച്ച ഗോള്‍ മാര്‍ജിനില്‍ ജയിച്ചതോടെ മുംബൈ സിറ്റി 24 പോയിന്റുമായി പട്ടികയില്‍ രണ്ടാം സ്ഥാനത്തെത്തി. 12 മത്സരം പൂര്‍ത്തിയായപ്പോള്‍ പട്ടികയില്‍ എട്ടാം സ്ഥാനത്ത് നില്‍ക്കുന്ന ബ്ലാസ്റ്റേഴ്‌സ് ഇനി പ്ലേ ഓഫില്‍ കടക്കില്ലെന്ന് ഉറപ്പായി.