വടക്കാഞ്ചേരി: എസ്.കെ.എസ്.എസ്.എഫ് തൃശൂര്‍ ജില്ലാ കമ്മിറ്റി സംഘടിപ്പിക്കുന്ന ഭാരതീയം ചരിത്ര സ്മൃതി യാത്രക്ക് ഇന്ന് വടക്കാഞ്ചേരിയില്‍ സ്വീകരണം നല്‍കുമെന്ന് സംഘാടക സമിതി വര്‍ക്കിങ് ചെയര്‍മാന്‍ ശിയാസ് അലി വാഫി വാര്‍ത്താ സമ്മേളനത്തില്‍ അറിയിച്ചു. ഉച്ചതിരിഞ്ഞ് മൂന്നിന് ജയശ്രീ ഓഡിറ്റോറിയത്തില്‍ വെച്ചു നടക്കുന്ന സ്വീകരണ സമ്മേളനം സുപ്രഭാതം എക്‌സിക്യൂട്ടീവ് എഡിറ്റര്‍ എ.സജീവന്‍ ഉദ്ഘാടം ചെയ്യും. സംഘാടക സമിതി ചെയര്‍മാന്‍ അനില്‍ അക്കര എം.എല്‍.എ അധ്യക്ഷനാകും. മദ്യ വിരുദ്ധ സമിതി തൃശൂര്‍ രൂപതാ ഡയറക്ടര്‍ ഫാ. ഡോ. ദേവസി പന്തല്ലൂക്കാരന്‍, അകമല ശ്രീധര്‍മ്മ ശാസ്താ ക്ഷേത്രം ട്രസ്റ്റ് പ്രസിഡന്റ് എം.എസ് രാഘവന്‍ തുടങ്ങിയവര്‍ മുഖ്യാതിഥികളായി പങ്കെടുക്കും. എസ്.കെ.എസ്.എസ്.എഫ് ജില്ലാ പ്രസിഡന്റ് സിദ്ധിഖ് ബദ്‌രി ദേശീയോദ്ഗ്രഥന പ്രതിഞ്ജ ചൊല്ലി കൊടുക്കും. നഗരസഭ വൈസ് ചെയര്‍മാന്‍ എം.ആര്‍ അനൂപ് കിഷോര്‍, ബ്ലോക്ക് പഞ്ചായത്ത് പ്രസിഡന്റ് എസ്.ബസന്ത്‌ലാല്‍, കെ.എസ് ഹംസ, അഡ്വ. ടി.എസ് മായാദാസ്, ശശികുമാര്‍ കൊടയ്ക്കാടത്ത് തുടങ്ങിയവര്‍ സ്‌നേഹ സന്ദേശം നല്‍കും. പ്രമുഖ പണ്ഡിതരും, ചിന്തകരുമായ ഓണമ്പിള്ളി മുഹമ്മദ് ഫൈസി, ബഷീര്‍ ഫൈസി ദേശമംഗലം എന്നിവരുടെ പ്രഭാഷണവും നടക്കും. സമൂഹത്തിന്റെ വിവിധ കോണുകളില്‍ നിന്നുള്ള നിരവധി പേര്‍ പങ്കെടുത്ത് സംസാരിക്കും. വാര്‍ത്താ സമ്മേളനത്തില്‍ സ്വാഗത സംഘം ജനറല്‍ കണ്‍വീനര്‍ എം.എം മുഹമ്മദ് ബഷീര്‍, ലബീബ് മങ്കര, സുലൈമാന്‍ കെ.എസ്, സാദിഖ് ഐ.എ എന്നിവരും പങ്കെടുത്തു.