ന്യൂഡല്‍ഹി: നുഴഞ്ഞുകയറിയ അഞ്ചു ഭീകരരെ സൈന്യം വധിച്ചു. പാക് അധീന കശ്മീരില്‍ നിന്ന് കുപ്പ്‌വാര ജില്ലയിലെ മച്ചിലിലേക്ക് നുഴഞ്ഞുകയറാന്‍ ശ്രമിക്കുന്നതിനിടയിലാണ് ഇവരെ സൈന്യം വധിച്ചത്. ഇന്നലെ രാത്രിയോടെയാണ് നുഴഞ്ഞുകയറാനുള്ള ശ്രമമുണ്ടായത്.
നിരീക്ഷണം നടത്തുന്നതിനിടെ അതിര്‍ത്തിയില്‍ സംശയാസ്പദമായ സാഹചര്യത്തില്‍ കണ്ട സംഘത്തിനുനേരെയുള്ള നടപടിക്കിടയിലാണ് ഇവര്‍ കൊല്ലപ്പെട്ടത്. അഞ്ചുപേരെയും സംഭവ സ്ഥലത്തു തന്നെ കൊലപ്പെടുത്തിയതായി സൈന്യം അറിയിച്ചു. ഭീകരരില്‍ നിന്ന് ആയുധം പിടിച്ചെടുത്തുവെന്നും സംഭവ സ്ഥലത്ത് ഇപ്പോഴും തിരച്ചില്‍ തുടരുകയാണെന്നും സൈനിക വക്താവ് ശ്രീനഗറില്‍ പറഞ്ഞു. കഴിഞ്ഞ ജൂലൈ 23ന് ഭീകരവാദികള്‍ ഇതേസ്ഥലത്ത് നടത്തിയ നുഴഞ്ഞു കയറ്റ ശ്രമത്തെ സുരക്ഷാ സേന തകര്‍ത്തിരുന്നു.