ദുബൈ: മറീനയിലെ മൊവന്‍പിക് ഹോട്ടലിലും തീപിടിത്തമുണ്ടായി. ഇന്നലെ രാവിലെ പത്തുമണിയോടെയാണ് സംഭവം. തുടര്‍ച്ചയായി ഈ പ്രദേശത്തുണ്ടാകുന്ന മൂന്നാമത്തെ തീപിടിത്തമാണിത്. ചെറിയ തീപിടിത്തമാണുണ്ടായതെന്ന് സിവില്‍ ഡിഫന്‍സ് അറിയിച്ചു. സ്ഥിതി നിയന്ത്രണവിധേയമാക്കിയെന്നും ഗള്‍ഫ് ന്യൂസ് റിപ്പോര്‍ട്ട് ചെയ്തു. തീപിടിത്തത്തില്‍ നാശനഷ്ടമില്ലെന്ന് താമസക്കാര്‍ അറിയിച്ചു. ജുമൈറ ബീച്ചിനടുത്തുള്ള കെട്ടിടത്തിലാണ് അഗ്നിബാധ.
വെള്ളിയാഴ്ച സമീപത്തെ 87 നിലകളുള്ള ടോര്‍ച്ച് ടവറിലും തീപിടിത്തമുണ്ടായിരുന്നു. 38ാം നിലയിലായിരുന്നു തീപിടിച്ചത്. സംഭവത്തില്‍ ദുബൈ പൊലിസ് അന്വേഷണം നടത്തുന്നുണ്ട്. ഞായറാഴ്ച മറീനയിലെ ടൈഗര്‍ ടവറിലും തീപിടിത്തമുണ്ടായിരുന്നു. 73 നിലകളുള്ള ടവറിന്റെ 53ാമത് നിലയിലായിരുന്നു തീപിടിത്തം. മിനുട്ടുകള്‍ക്കകം ഇതു നിയന്ത്രണ വിധേയമാക്കാന്‍ കഴിഞ്ഞു.