തിരുവനന്തപുരം: ഉദ്യോഗസ്ഥരുടെ ഉദാസീന സമീപനത്തില്‍ വലയുന്ന വിവിധ തൊഴിലാളികള്‍ക്ക് സന്തോഷവാര്‍ത്ത. സര്‍ക്കാര്‍ സേവനവുമായി ബന്ധപ്പെട്ട ഉദ്യോഗസ്ഥ നടപടികള്‍ സസൂക്ഷ്മം നിരീക്ഷിക്കാന്‍ തൊഴില്‍ വകുപ്പ് മൊബൈല്‍ ആപ്പ് സംവിധാനം ഒരുക്കുന്നു. പരാതിക്കാരുടെ അഭിപ്രായത്തിന്റെ അടിസ്ഥാനത്തില്‍ ഉദ്യോഗസ്ഥരുടെ റേറ്റിങ് നിശ്ചയിക്കാനടക്കം സൗകര്യമുള്ള ആപ്പാണ് ഉടന്‍ പ്രവര്‍ത്തനമാരംഭിക്കാനിരിക്കുന്നത്. തൊഴില്‍തര്‍ക്ക പരിഹാരങ്ങളില്‍ മികവു പുലര്‍ത്തുന്ന ഉദ്യോഗസ്ഥര്‍ക്കു പ്രോത്സാഹനം നല്‍കുക എന്നതും സംവിധാനത്തിലൂടെ വകുപ്പ് ലക്ഷ്യമിടുന്നു.
തൊഴില്‍മേഖലയിലെ പരാതികള്‍ അറിയിക്കാനും അന്വേഷണങ്ങള്‍ക്കുമായി നടപ്പാക്കിയ കോള്‍ സെന്റര്‍ സംവിധാനം രണ്ടാം വര്‍ഷത്തിലേക്കു കടന്നതോടെയാണ് ഉദ്യോഗസ്ഥരെ നിരീക്ഷിക്കാന്‍ പുതിയ മൊബൈല്‍ ആപ്പ് തൊഴില്‍ വകുപ്പ് തയാറാക്കുന്നത്. അന്വേഷണങ്ങള്‍, പതിവുചോദ്യങ്ങള്‍, പരാതി പരിഹാര റേറ്റിങ് തുടങ്ങിയ സവിശേഷതകള്‍ ഉള്‍പ്പെടുത്തിയ മൊബൈല്‍ ആപ്ലിക്കേഷനാണിത്. ഈ വര്‍ഷം തന്നെ ആപ്പ് പ്രവര്‍ത്തിച്ചുതുടങ്ങും.
തൊഴില്‍ വകുപ്പ് ആസ്ഥാനമായ ലേബര്‍ കമ്മിഷണറേറ്റില്‍ പ്രവര്‍ത്തിക്കുന്ന കോള്‍ സെന്ററില്‍ രണ്ടുവര്‍ഷത്തിനിടെ പരാതികളും അന്വേഷണങ്ങളുമായി വന്നത് 8,000ലേറെ വിളികളാണ്. എല്ലാ അന്വേഷണങ്ങള്‍ക്കും ഉടന്‍ തന്നെ മറുപടി നല്‍കിയതായി വകുപ്പ് അധികൃതര്‍ അറിയിച്ചു. വേതനം, കയറ്റിറക്കുകൂലി, പൊതു അന്വേഷണങ്ങള്‍ എന്നിവയാണ് കോള്‍ സെന്ററില്‍ എത്തിയത്. കഴിഞ്ഞ ജൂലൈ 31 വരെ 8,638 കോളുകളാണ് സെന്ററില്‍ ലഭിച്ചത്. 1,103 പരാതികളില്‍ 877 എണ്ണത്തിനു പരിഹാരനടപടികളായിട്ടുണ്ട്. 226 പരാതികളില്‍ തീരുമാനമാകാന്‍ ബാക്കിയിരിക്കുന്നു.
തൊഴില്‍ നിരസിക്കല്‍, മിനിമം വേതനം, ശമ്പള കുടിശ്ശിക എന്നിവ നല്‍കാതിരിക്കല്‍, കയറ്റിറക്കുകൂലി തര്‍ക്കം, സര്‍ട്ടിഫിക്കറ്റുകള്‍ പിടിച്ചുവയ്ക്കല്‍, ഗ്രാറ്റിവിറ്റി അടയ്ക്കാതിരിക്കല്‍, ദേശീയ-ഉത്സവ അവധികള്‍ നല്‍കാതിരിക്കല്‍ എന്നിവയ്ക്കു പുറമേ ബോണസ്, പ്രസവാവധി, സുരക്ഷാവീഴ്ചകള്‍ ഉള്‍പ്പെടെയുള്ളവ സംബന്ധിച്ച പരാതികളാണ് കോള്‍ സെന്ററില്‍ ലഭിക്കുന്നത്. മിനിമം വേതനം ലഭിക്കാത്തതു സംബന്ധിച്ചു ലഭിച്ച 289 പരാതികളില്‍ 254 എണ്ണത്തിനും തീര്‍പ്പുകല്‍പ്പിച്ചു. തൊഴില്‍ നിഷേധം സംബന്ധിച്ച 241 പരാതികളില്‍ ബന്ധപ്പെട്ട തൊഴില്‍ മാനേജ്‌മെന്റ്, തൊഴിലാളി പ്രതിനിധികള്‍ ഉള്‍പ്പെടെയുള്ളവരുമായി അനുരഞ്ജന ചര്‍ച്ചകള്‍ നടത്തി തീരുമാനമെടുക്കേണ്ടതിനാല്‍ 129 പരാതികള്‍ മാത്രമേ ഇതുവരെ തീര്‍പ്പുകല്‍പ്പിക്കാനായുള്ളൂ.
2015 ഓഗസ്റ്റ് 25നാണ് കോള്‍ സെന്റര്‍ പ്രവര്‍ത്തനമാരംഭിച്ചത്. കമ്മിഷണറേറ്റില്‍ ഒന്നാംനിലയില്‍ പ്രവര്‍ത്തിക്കുന്ന കോള്‍ സെന്ററില്‍ രാവിലെ ഏഴുമുതല്‍ രാത്രി ഏഴുവരെ മൂന്ന് ഷിഫ്റ്റുകളിലായി മൂന്നുപേര്‍ കോളുകള്‍ സ്വീകരിക്കാനുണ്ടാകും. ഇതര സംസ്ഥാന തൊഴിലാളികള്‍ ഉള്‍പ്പെടെയുള്ളവര്‍ കോള്‍ സെന്ററിന്റെ സേവനം പ്രയോജനപ്പെടുത്തുന്നുണ്ട്. പ്രതിദിനം ശരാശരി ഇരുപതിലേറെ വിളികളാണ് എത്തുന്നത്.
തിരുവനന്തപുരം ഡെപ്യൂട്ടി ലേബര്‍ കമ്മിഷണര്‍ക്കാണ് കോള്‍ സെന്ററിന്റെ ചുമതല. കോള്‍ വരുമ്പോള്‍ കോള്‍ സെന്റര്‍ മാനേജ്‌മെന്റ് സോഫ്റ്റ്‌വെയറും ലേബര്‍ കമ്മിഷണറേറ്റ് ഓട്ടോമേഷന്‍ സിസ്റ്റവുമായി ബന്ധിപ്പിച്ചതിനാല്‍ പരാതിക്കാരന് ടോക്കണ്‍നമ്പറും തൊഴില്‍ വകുപ്പിലെ ബന്ധപ്പെട്ട ഉദ്യോഗസ്ഥനു പരാതിക്കാരന്റെ പേര്, പരാതിയുടെ സംഗ്രഹം എന്നീ വിവരങ്ങളും എസ്.എം.എസ് ആയി ഒരേസമയം ലഭ്യമാക്കും. ഇത്തരത്തില്‍ ലഭിക്കുന്ന പരാതികള്‍ പരിഹരിക്കപ്പെട്ടാല്‍ ബന്ധപ്പെട്ട ഉദ്യോഗസ്ഥന്‍ അത് സോഫ്റ്റ്‌വെയറില്‍ അപ്‌ഡേറ്റ് ചെയ്യും. ആ വിവരം ലേബര്‍ കമ്മിഷണറേറ്റ് ഓട്ടോമേഷന്‍ സിസ്റ്റത്തില്‍ നിരീക്ഷിക്കുകയാണ് ചെയ്തുവരുന്നത്.