നല്ല കുട്ടിയാവുക എന്നതിനര്‍ഥം നല്ല വസ്ത്രം ധരിക്കുന്ന ചെത്ത് ഹെയര്‍ സ്റ്റൈലോടെ നടക്കുന്ന കുട്ടിയാവുക എന്നതല്ല. നല്ലകുട്ടിയാവുക എന്നതിനര്‍ഥം പരീക്ഷകളില്‍ എപ്ലസും ഒന്നാം റാങ്കും വാങ്ങുന്ന കുട്ടിയാവുക എന്നത് പോലുമല്ല. 

ഒരുകുട്ടി ആത്യന്തികമായി നല്ലതാവുന്നത് അവന് അവള്‍ക്ക് സഹജീവികളെ സ്‌നേഹിക്കാനും അവരോട് കാരുണ്യത്തോടെ പെരുമാറാനുമുള്ള ശേഷിയുണ്ടാവുമ്പോഴാണ്. ആ സ്ഥിതി വിശേഷണത്തിനാണ് മഹാകവി കുമാരനാശാന്‍''പരക്ലേശ വിവേകം'' എന്ന് പറഞ്ഞിരിക്കുന്നത്. പരക്ലേശ വിവേകം മനുഷ്യനില്‍ സൃഷ്ടിക്കുന്നത് സാഹിത്യത്തേയും കലയേയുമെല്ലാമാണ്. അതിനാല്‍ നിങ്ങള്‍ക്ക് നല്ല കുട്ടിയാവണമെങ്കില്‍ കലയും, സാഹിത്യവും ആസ്വദിക്കാനും സര്‍ഗാത്മകത വളര്‍ത്തിയെടുക്കാനും സാധിക്കണം.
ഈ പറയുന്നത് കൊണ്ട് ഫിസിക്‌സും കെമിസ്ട്രിയും ബയോളജിയും മാത്തമാറ്റിക്‌സും ഒന്നും പഠിക്കേണ്ടതില്ല എന്നല്ല ഞാന്‍ ഉദ്ദേശിക്കുന്നത്. ഫിസിക്‌സ് പഠിച്ചാലേ നമുക്ക് ഊര്‍ജോല്‍പാദനത്തിനും മറ്റുമുള്ള വിദ്യ സ്വായത്തമാക്കാന്‍ സാധിക്കുകയുള്ളൂ. കെമിസ്ട്രിയുടെ സഹായമില്ലാതെ മരുന്നുകളോ ചായങ്ങളോ ഉല്‍പാദിപ്പിക്കാന്‍ സാധിക്കുകയില്ല.
അഗ്രികള്‍ച്ചറല്‍ സയന്‍സിലെ പ്രാവീണ്യമാണ് കാര്‍ഷിക വിളകളുടെ വര്‍ധനവിലേക്ക് കൃഷിയെ നയിച്ചത്. എന്നാല്‍ ഊര്‍ജമുപയോഗിക്കാനോ മരുന്നുകുടിക്കാനോ മാത്രമല്ലല്ലോ നാം ജീവിക്കുന്നത്. ജീവിതത്തിന്റെ ആത്യന്തികലക്ഷ്യം സ്‌നേഹിക്കുന്നതിലൂടെയും സ്‌നേഹിക്കപ്പെടുന്നതിലൂടെയും ലഭിക്കുന്ന ആത്മ നിര്‍വൃതിയാണ്. പ്രകൃതിയും പ്രപഞ്ചവും പ്രപഞ്ച വിദാതാവുമായുള്ള സംലയനത്തിന്റെ അനുഭൂതി വിശേഷങ്ങളും ജീവിതത്തിന്റെ പരമമായ സാക്ഷാത്കാരമാണ്.
ഇതെല്ലാം നേടുന്ന സമയത്തേ മനുഷ്യന്‍ പൂര്‍ണ മനുഷ്യനാവുകയുള്ളൂ. പൂര്‍ണ മനുഷ്യരാണ് നല്ല മനുഷ്യര്‍. ആ നല്ല മനുഷ്യരില്‍ എത്തിച്ചേരാനുള്ള കളരിയാണ് അടിസ്ഥാനപരമായി വിദ്യാഭ്യാസം. അല്ലാതെ കുറെ വിവരങ്ങളുടെ ഭാണ്ഡങ്ങള്‍ തലയിലേറ്റി നടക്കുന്ന റോബോട്ടുകളെ സൃഷ്ടിക്കലല്ല.
നല്ല വ്യക്തിയെ, നല്ല പൗരനെ, നല്ല മനുഷ്യനെ സൃഷ്ടിച്ചെടുക്കാനുള്ള പ്രവര്‍ത്തന പദ്ധതിയാണ് വിദ്യാഭ്യാസം. ഈ തത്വത്തിന് ഇന്ന് മങ്ങലേറ്റിട്ടുണ്ട്. ആ തത്വത്തെ തുടച്ചു മിനുക്കി തിരിച്ചെടുക്കാന്‍ സാധിക്കുമ്പോള്‍ അധ്യാപകര്‍ക്കും രക്ഷിതാക്കള്‍ക്കും നിങ്ങളില്‍ സ്വാഭാവികമായും നല്ലകുട്ടികളെ പരിപോഷിപ്പിക്കാന്‍ കഴിയുന്നതാണ്.

ഒരുകുട്ടി ആത്യന്തികമായി നല്ലതാവുന്നത് അവന്, അവള്‍ക്ക് സഹജീവികളെ സ്‌നേഹിക്കാനും അവരോട് കാരുണ്യത്തോടെ പെരുമാറാനുമുള്ള ശേഷിയുണ്ടാവുമ്പോഴാണ്