സുല്‍ത്താന്‍ ബത്തേരി: വയനാട് വന്യജീവി സങ്കേതത്തില്‍നിന്ന് ചന്ദനം മുറിച്ചുകടത്തി. ബത്തേരി റെയിഞ്ചില്‍ നിന്നാണ് ഏഴ് ചന്ദന മരങ്ങള്‍ മുറിച്ചുകടത്തിയത്.
സംഭവത്തില്‍ വനംവകുപ്പ് അന്വേഷണം ആരംഭിച്ചു. ഞായറാഴ്ച രാത്രിയാണ് മരങ്ങള്‍ മുറിച്ചുകടത്തിയത്. ബത്തേരി റെയിഞ്ചിലെ ഓടപ്പള്ളം ഫോറസ്റ്റ് സെക്ഷനില്‍പ്പെടുന്ന കല്ലുമുക്ക് ചുണ്ടപ്പാടി വനാതിര്‍ത്തിയില്‍ നിന്നുമാണ് ചന്ദനമരങ്ങള്‍ മുറിച്ചുകടത്തിയത്. അഞ്ചു മരങ്ങളുടെ ചുവട് ഭാഗത്തുനിന്നും കഷ്ണങ്ങള്‍ മുറിച്ചെടുത്ത നിലയിലാണ്.
ഒന്നും ഒന്നരയും അടി വണ്ണമുള്ള മരങ്ങളാണ് മുറിച്ചത്. മരങ്ങള്‍ക്ക് കാതല്‍ ഇല്ലാത്തതിനാല്‍ ഏറിയപങ്കും ഉപേക്ഷിച്ച നിലയിലാണുള്ളത്. സംഭവത്തെത്തുടര്‍ന്ന് ബത്തേരി അസിസ്റ്റന്റ് വൈല്‍ഡ് ലൈഫ് വാര്‍ഡന്‍ കൃഷ്ണദാസിന്റെ നേതൃത്വത്തില്‍ വനംവകുപ്പ് അധികൃതര്‍ സ്ഥലത്തെത്തി അന്വേഷണം ആരംഭിച്ചു.