ആനക്കര: പടിഞ്ഞാറങ്ങാടിയിലെ മൂന്നോളം വ്യാപാരസ്ഥാപനങ്ങളില്‍ മോഷണം. ലോട്ടറി, സ്റ്റേഷനറി, സ്‌പോട്‌സ് തുടങ്ങിയ സ്ഥാപനങ്ങളിലാണ് മോഷണം നടന്നത്. ഇവിടെനിന്നും 25,000 രൂപയിലേറെ പണവും നഷ്ടപ്പെട്ടിട്ടുണ്ട്. ഞായറാഴ്ച പുലര്‍ചെ 2.30നാണ് സംഭവം. പടിഞ്ഞാറങ്ങാടിയിലെ ഒരു ഫര്‍ണിച്ചര്‍ കടയില്‍ സ്ഥാപിച്ച സി.സി.ടി.വി ദൃശ്യങ്ങളില്‍ മോഷ്ടാക്കളെ കുറിച്ച് വ്യക്തമായ രൂപം ലഭിച്ചിട്ടുണ്ട്. കാമറയില്‍ മോഷ്ടാക്കള്‍ വന്നസമയവും മറ്റും രേഖപെടുത്തിയത് തൃത്താല പൊലിസ് പരിശോധിച്ചു. കറുത്ത മുഖംമൂടിയും പാന്‍സും ഷര്‍ട്ടുമാണ് ഇവരുടെ വേഷം. രണ്ട് പേര്‍ ബൈക്കിലെത്തിയതായും കൂട്ടാളികള്‍ സമീപത്തായി നില്‍ക്കുന്നതായും കാണാനുണ്ട്. കുമ്പിടിയിലും ഒരുകടയില്‍ മോഷണം നടന്നിട്ടുണ്ട്. തൃത്താല പൊലിസ് അന്വേഷണം ഊര്‍ജിതമാക്കി. വിരലടയാള വിദ്ഗധരും ഡോഗ് സ്‌കോഡും സ്ഥലത്തെത്തി തെളിവെടുത്തു.