ന്യൂഡല്‍ഹി: രാജ്യത്തെ സ്‌കൂളുകളില്‍ യോഗാ പഠനം നിര്‍ബന്ധമാക്കണമെന്ന ഹരജി സുപ്രിംകോടതി തള്ളി. ജസ്റ്റിസ് എം.ബി ലോകൂര്‍ അധ്യക്ഷനായ ബഞ്ചാണ് ഹരജി തള്ളിയത്.

ഇത്തരം വിഷയങ്ങളില്‍ കോടതിക്ക് തീരുമാനമെടുക്കാന്‍ കഴിയില്ലെന്നും സര്‍ക്കാറാണ് തീരുമാനിക്കേണ്ടതെന്നും കോടതി ചൂണ്ടിക്കാട്ടി. സ്‌കൂളുകളില്‍ എന്ത് പഠിപ്പിക്കണമെന്ന് സുപ്രിംകോടതിക്ക് ഉത്തരവിടാനാകില്ല. അത് തങ്ങളുടെ അധികാരപരിധിയില്‍ വരുന്ന കാര്യമല്ല. അതുകൊണ്ട് തന്നെ ഇക്കാര്യത്തില്‍ എങ്ങനെ തീര്‍പ്പ് കല്‍പ്പിക്കാനാകുമെന്നും ബഞ്ച് ചോദിച്ചു.

 ബി.ജെ.പിയുടെ ഡല്‍ഹി വക്താവും അഭിഭാഷകനുമായ അശ്വനി കുമാര്‍ ഉപാധ്യായയാണ് ഹരജി സമര്‍പ്പിച്ചത്. ദേശീയ യോഗ നയത്തിന്റെ ഭാഗമായി ഒന്നു മുതല്‍ എട്ടാം ക്ലാസ് വരെയുള്ള വിദ്യാര്‍ഥികള്‍ക്ക് യോഗ പാഠ്യവിഷയമാക്കണമെന്നായിരുന്നു ഹരജിയിലെ ആവശ്യം.

നേരത്തേ സ്‌കൂള്‍ സിലബസുകളില്‍ യോഗ ഉള്‍പ്പെടുത്തണമെന്ന് സംസ്ഥാനങ്ങളോട് കേന്ദ്ര സര്‍ക്കാര്‍ ആവശ്യപ്പെട്ടിരുന്നു. ഇക്കാര്യമുന്നയിച്ച് മാനവവിഭവശേഷി മന്ത്രാലയം സംസ്ഥാനങ്ങള്‍ക്ക് കത്തയച്ചിരുന്നു. പൊലിസുകാര്‍ക്ക് യോഗ നിര്‍ബന്ധമാക്കിയിട്ടുണ്ട്.