ബോവിക്കാനം: ദിവസേന നിരവധിപേര്‍ ആശ്രയിക്കുന്ന ബോവിക്കാനം ടൗണിലെ ശുചിമുറിയില്‍ വെള്ളമില്ല. തൊട്ടടുത്ത ഹോട്ടലകളില്‍ നിന്നുള്ള വെള്ളം ഉപയോഗിച്ചാണ് ശുചിമുറി ഉപയോഗിക്കുന്നത്. ബോവിക്കാനം ടൗണിലെ പി.എച്ച്.സിക്ക് സമീപത്തുള്ള പഞ്ചായത്ത് ശുചിമുറിയിലാണ് ദിവസങ്ങളായി വെള്ളമില്ലാത്തത്.
വെള്ളമെടുത്തിരുന്ന തൊട്ടടുത്തുള്ള കുഴല്‍ കിണറിന്റെ മോട്ടോര്‍ തകരാറിലായതോടെയാണ് ശുചിമുറിയില്‍ വെള്ളമില്ലാതായത്.
മോട്ടോര്‍ തകരാര്‍ ഉടന്‍ പരിഹരിക്കുമെന്ന് അധികൃതര്‍ പറഞ്ഞുവെങ്കിലും രണ്ടാഴ്ച്ച കഴിഞ്ഞിട്ടും ഒരു നടപടിയും ഉണ്ടായില്ല. മുളിയാര്‍ പി.എച്ച്.സിയിലെത്തുന്ന രോഗികളുള്‍പ്പടെ വിവിധ ആവശ്യങ്ങള്‍ക്കായി ബോവിക്കാനം ടൗണിലെത്തുന്നവര്‍ക്ക് പ്രാഥമിക ആവശ്യം നിര്‍വഹിക്കാനുള്ള ഏക ആശ്രയമാണ് ഈ ശുചിമുറി. തകരാറിലായ മോട്ടോര്‍ ശരിയാക്കി ശുചിമുറിയില്‍ വെള്ളമെത്തിക്കാനുള്ള നടപടി പഞ്ചായത്ത് അധികൃതര്‍ സ്വീകരിക്കണമെന്നാണ് നാട്ടുകാരുടെ ആവശ്യം.